હોકી ચેમ્પિયનશિપ’માં મધ્યપ્રદેશની ગર્લ્સ અને બોઇસ બંને ટીમો ફાઈનલમાં વિજેતા બની

સુરત: વીર નર્મદ દક્ષિણ ગુજરાત યુનિવર્સિટી-સુરત ખાતે હોકી ઇન્ડિયા-વેસ્ટ ઝોન દ્વારા ૨૩થી ૩૦ જુલાઇ સુધી સાત દિવસીય સબ જુનિયર મેન એન્ડ વુમન ચેમ્પિયનશિપ યોજાઈ હતી. જેમાં ગુજરાત, મહારાષ્ટ્ર, રાજસ્થાન, મધ્યપ્રદેશ, છત્તીસગઢ, દીવ, દાદરા અને નગર હવેલીની કુલ ૧૩ હોકી ટીમોએ ભાગ લીધો હતો. જેમાં ૭ બોયઝ ટીમો અને ૬ ગર્લ્સ ટીમો સમાવિષ્ટ હતી. બોયઝ ટીમ અને ગર્લ્સ ટીમની ફાઈનલ ટુર્નામેન્ટ ૩૦ જુલાઇએ રમાઈ હતી.

ગર્લ્સ ફાઈનલ મેચ મધ્યપ્રદેશ અને હોકી છત્તીસગઢ વચ્ચે રમાઈ, જેમાં મધ્ય પ્રદેશે ૭-૧ થી ટુર્નામેન્ટ જીતી લીધી હતી. જ્યારે ત્રીજા સ્થાને મહારાષ્ટ્ર ટીમ ૫-૦થી રાજસ્થાન સામે જીતી હતી. બોયઝ ટીમમાં મધ્યપ્રદેશ અને મહારાષ્ટ્ર વચ્ચે ફાઇનલ રમાઈ, જેમાં મધ્યપ્રદેશે ૭-૧ થી જીત મેળવી હતી. ત્રીજા સ્થાન પર દાદરા નગર હવેલી અને દમણ દીવ વિરુદ્ધ છત્તીસગઢ વચ્ચે રમાઈ જેમાં ૧-૧ (૫-૬ SO) થી છત્તીસગઢ વિજેતા થયું હતું.

હોકી ચેમ્પિયનશીપમાં યુનિ.ના કાર્યકારી કુલપતિ ડો. કિશોરસિંહ ચાવડા, કુલ સચિવ ડો રમેશદાન ગઢવી, પત્રકારત્વ વિભાગના કોર્ડીનેટર ડો. ભરત ઠાકોર અને યુવક કલ્યાણ વિભાગના વડા ડો. પ્રકાશચંદ્ર પટેલ સહિત રમતપ્રેમીઓ ઉપસ્થિત રહ્યા હતા.