ગાંધીધામ, 20 એપ્રિલઃ શિલોંગ (મેઘાલય) ખાતે ચાલી રહેલી 83મી સિનિયર નેશનલ અને ઇન્ટર સ્ટેટ ટેબલ ટેનિસ ચેમ્પિયનશિપમાં ગુજરાતના માનુષ શાહે એકલા હાથે લડત આપી હતી પરંતુ તેની કમાલ પૂરતી રહી ન હતી કેમ કે ગુજરાતની મેન્સ અને વિમેન્સ ટીમનો પ્રિક્વાર્ટર ફાઇનલમાં પરાજય થયો હતો.
ગ્રૂપ તબક્કામાં ગુજરાતે શાનદાર ફોર્મ દાખવીને પંજાબ, કેરળ, આંધ્ર પ્રદેશ અને અરૂણાચ પ્રદેશને 3-0થી હરાવ્યું હતું.
જોકે તેઓ આ ફોર્મને ઉત્તર પ્રદેશ સામેની પ્રિ ક્વાર્ટર ફાઇનલ સુધી જાળવી શક્યા ન હતા. ખભાની ઇજામાંથી સાજા થયા બાદ રમી રહેલા માનુષ શાહે ટીમની આશા જીવંત રાખતાં દિવ્યાંશ શ્રીવાસ્તવ સામેની સિંગલ્સ મેચ (11-8, 6-11, 11-4, 11-9) અને અભિષેક યાદવ સામેની સિંગલ્સ મેચ (11-3, 11-7, 12-10) જીતી લીધી હતી. જોકે ચિત્રાક્ષ ભટ્ટ (બંને મેચમાં પરાજય) અને ઇશાન હિંગોરાણી અપેક્ષા મુજબનો દેખાવ કરવામાં નિષ્ફળ રહ્યા હતા અને ગુજરાતનો 2-3થી પરાજય થયો હતો.
ગુજરાતની વિમેન્સ ટીમ પણ આવી જ રીતે હારી હતી કેમ કે પ્રિ ક્વાર્ટર ફાઇનલમાં તેમનો ટીટીટીએ સામે 1-3થી પરાજય થયો હતો.
સેલવાકુમાર સેલેના દિપ્તી સામે કૌસા ભૈરપૂરેનો 10-12, 9-11, 6-11થી પરાજય થયા બાદ ફ્રેનાઝ છિપીયાએ કૌવશિકા વેંકટેશન સામે 5-11, 11-8, 15-13, 11-9થી વિજય હાંસલ કરીને ટીમ માટે સ્કોર સરભર કર્યો હતો.
જોકે ફિલઝાહ ફાતીમા કાદરીનો નિત્યાશ્રી મણી સામે 9-11, 11-3, 9-11થી પરાજય થતાં ગુજરાતને પીછેહઠ કરવી પડી હતી. અંતે સેલેના દિપ્તી સામે ફ્રેનાઝ 11-4, 6-11, 4-11, 6-11થી હારી જતાં ગુજરાતના પડકારનો અંત આવ્યો હતો.
અગાઉ પ્રારંભિક મેચમાં બંગાળ-એ સામે 1-3થી પરાજય બાદ ગુજરાતને વળતો પ્રહાર કર્યો હતો અને મણીપુર (3-0) તથા આસામ (3-1) સામે વિજય હાંસલ કરીને ગ્રૂપમાં બીજા ક્રમે રહ્યું હતું.
