ધ રેડિયન્ટ ઇન્ટરનેશનલ સ્કૂલની અંડર-17 ગર્લ્સ ટીમ સતત બીજી વખત ચેમ્પિયન
ઇન્દોર સુપર લીગ ઓલ ઇન્ડિયા ફૂટબોલ ટુર્નામેન્ટની ફાઇનલમાં રાજસ્થાનને 3-2થી હરાવ્યું, સુરતની ટીમે જીતનો સિલસિલો જાળવ્યો
સુરત: ધ રેડિયન્ટ ઇન્ટરનેશનલ સ્કૂલ, સુરતની અંડર-17 ગર્લ્સ ફૂટબોલ ટીમે ઇન્દોર સુપર લીગ ઓલ ઇન્ડિયા ફૂટબોલ ટુર્નામેન્ટમાં શાનદાર પ્રદર્શન કરીને ચેમ્પિયનશિપનો ખિતાબ જીત્યો છે. ફાઇનલ મુકાબલામાં ટીમે રાજસ્થાનની ટીમને 3-2થી હરાવી સતત બીજી વખત ચેમ્પિયન બનવાનું ગૌરવ પ્રાપ્ત કર્યું હતું.
ફાઇનલ મુકાબલો રોમાંચક રહ્યો હતો. બંને ટીમો વચ્ચે કાંટાની ટક્કર જોવા મળી હતી, પરંતુ રેડિયન્ટ ઇન્ટરનેશનલ સ્કૂલની ખેલાડીઓએ ઉત્તમ રણનીતિ, ટીમવર્ક અને દૃઢ નિશ્ચયના આધારે વિજય મેળવ્યો હતો. ખેલાડીઓએ સમગ્ર ટુર્નામેન્ટ દરમિયાન પોતાની પ્રતિભા અને રમત પ્રત્યેના જુસ્સાનું પ્રદર્શન કર્યું હતું.
આ જીત સાથે ટીમે સતત બીજી વખત ચેમ્પિયન બનીને પોતાની શ્રેષ્ઠતા સાબિત કરી છે. ખેલાડીઓની મહેનત, શિસ્ત અને સામૂહિક પ્રયાસોના પરિણામે મળેલી આ સફળતાથી શાળા પરિવાર સહિત સુરતનું ગૌરવ વધ્યું છે. ટીમની આ સિદ્ધિ બદલ ખેલાડીઓની પ્રશંસા થઈ રહી છે.
