ધારાસભ્ય સંદીપ દેસાઈએ બમરોલી – વડોદ – ભીમરાડ વિસ્તાર થી ઉત્તર ગુજરાતની રાત્રી બસ સેવાનો શુભારંભ કરાવ્યો

સુરત શહેરના બમરોલી, વડોદ, ભીમરાડ તેમજ આજુબાજુના સંલગ્ન વિસ્તારોની અસંખ્ય સોસાયટીઓમાં મહત્તમ ઉત્તર ગુજરાતના નાગરિકો વસવાટ કરે છે. જેઓની માંગણી અને લાગણીને ધ્યાને લઈ ધારાસભ્ય સંદીપ દેસાઈએ નાયબ મુખ્યમંત્રી હર્ષ સંઘવીને મૂળ ઉત્તર ગુજરાતના જન પ્રતિનિધિઓ સાથે ઉત્તર ગુજરાતના (મહેસાણા, ઊંઝા, પાટણ, સિદ્ધપુર તેમજ વિસનગર) રૂટની રાત્રી બસ સેવા બમરોલી – વડોદ – ભીમરાડ વિસ્તારથી શરૂ કરવા રજૂઆત કરી હતી.

જેમાં પ્રથમ તબક્કામાં મહેસાણા – ઊંઝા – પાટણની રાત્રી બસ સેવાનો મૂળ ઉત્તર ગુજરાતના અસંખ્ય સ્થાનિક નાગરિકોની ઉપસ્થિતમાં ઉમિયા માતાજી મંદિર, અમીઝરા રેસીડેન્સી, બમરોલી ખાતેથી લીલી ઝંડી બતાવી ધારાસભ્ય સંદીપ દેસાઈએ શુભારંભ કરાવ્યો. તેમજ બસમાં સ્થાનિક નાગરિકો સાથે બેસી રાઉન્ડ લઈ હળવાશની પળ માંણી સંવાદ કર્યો હતો. આ બસ સેવા ઉમિયા માતાજી મંદિર, બમરોલી – તિરૂપતિ સર્કલ, વડોદ – ભીમરાડ – ડી માર્ટ – પાંડેસરા – સોસીયો સર્કલ – જોગણી માતાજી મંદિર – ખરવરનગર – ઉધના દરવાજા – સુરત સેન્ટ્રલ બસ સ્ટેશન વિસ્તારને આવરી લેશે.

આ કાર્યક્રમમાં સ્થાનિક બમરોલી, વડોદ, ભીમરાડ વિસ્તારની સોસાયટીઓના આગેવાનો, મૂળ ઉત્તર ગુજરાતના જન પ્રતિનિધિઓ, હોદ્દેદારઓ, આગેવાનો, મહિલા, બાળકો તમામ વર્ગના લોકો ઉપસ્થિત રહ્યા હતા.

પ્રતિસાદ

ઉત્તર ગુજરાતના નાગરિકો માટે આ બસ સેવા આશીર્વાદ સમાન નીવડશે. આ વિસ્તારમાં વધતા જતા મૂળ ઉત્તર ગુજરાતના રહેવાસીઓને ઘર આંગણે સેવા આપવા ધારાસભ્ય સંદીપ દેસાઈનો હાર્દિક આભાર માનીએ છીએ.
પ્રવિણ પટેલ, પ્રમુખ, અમીઝરા રેસીડેન્સી, વડોદ, સુરત