મોંઘવારીના વિરોધમાં AAP મહિલા સંગઠનનું કલેક્ટર કચેરીએ પ્રદર્શન
પેટ્રોલ-ડીઝલ, ગેસથી લઈને દૂધ અને શાકભાજીના ભાવ ઘટાડવાની માંગ સાથે મુખ્યમંત્રીના નામે આવેદનપત્ર આપ્યું

સુરત : સતત વધી રહેલી મોંઘવારીના વિરોધમાં આમ આદમી પાર્ટીના ગુજરાત પ્રદેશ મહિલા સંગઠન દ્વારા શુક્રવારે સુરત જિલ્લા કલેક્ટર કચેરી ખાતે વિરોધ પ્રદર્શન કરવામાં આવ્યું હતું. મહિલા કાર્યકરોએ સરકાર સામે નારાજગી વ્યક્ત કરી મોંઘવારીથી સામાન્ય જનતાને રાહત આપવાની માંગ કરી હતી. આ દરમિયાન મુખ્યમંત્રીના નામે જિલ્લા કલેક્ટરને આવેદનપત્ર પાઠવી પેટ્રોલ-ડીઝલ, રાંધણગેસ સહિત જીવનજરૂરી વસ્તુઓના ભાવ ઘટાડવાની માંગ કરવામાં આવી હતી.
મહિલા સંગઠને આવેદનપત્રમાં જણાવ્યું હતું કે પેટ્રોલ-ડીઝલ, રાંધણગેસ, દૂધ, શાકભાજી, ખાદ્યતેલ, અનાજ અને દવાઓના સતત વધી રહેલા ભાવને કારણે સામાન્ય પરિવારોનું બજેટ ખોરવાઈ ગયું છે. આવક મર્યાદિત છે, જ્યારે ખર્ચમાં સતત વધારો થઈ રહ્યો છે. મધ્યમવર્ગીય પરિવારોની બચત ઘટી રહી છે અને ગરીબ પરિવારો માટે બે ટંકનું ભોજન મેળવવું પણ મુશ્કેલ બન્યું છે. મોંઘવારીને કારણે મહિલાઓએ ઘરખર્ચમાં કાપ મૂકવો પડી રહ્યો છે, જેની અસર બાળકોના શિક્ષણ અને પરિવારના સ્વાસ્થ્ય પર પણ પડી રહી છે.
પાંચ મુખ્ય માંગણીઓ સાથે આંદોલનની ચીમકી
આવેદનપત્રમાં પેટ્રોલ-ડીઝલ અને ઘરેલુ ગેસના ભાવ ઘટાડવા, દૂધ, ખાદ્યતેલ, અનાજ, કઠોળ અને શાકભાજીના ભાવ નિયંત્રણમાં રાખવા, સંગ્રહખોરી અને કાળાબજાર સામે કડક કાર્યવાહી કરવા તથા મોંઘવારી નિયંત્રણ માટે સમયબદ્ધ નક્કર યોજના જાહેર કરવાની માંગ કરવામાં આવી હતી.
મહિલા સંગઠને જણાવ્યું હતું કે સરકાર વિકાસના દાવા કરે છે, પરંતુ સામાન્ય જનતા રોજિંદી જરૂરિયાતો પૂરી કરવા સંઘર્ષ કરી રહી છે. હવે માત્ર આશ્વાસન નહીં, પરંતુ મોંઘવારીમાંથી વાસ્તવિક રાહત જોઈએ. માંગણીઓ પર ટૂંક સમયમાં હકારાત્મક નિર્ણય નહીં લેવાય તો જનતાના હિતમાં લોકશાહી ઢબે આંદોલન વધુ ઉગ્ર બનાવવાની ચીમકી પણ ઉચ્ચારવામાં આવી હતી.



