કોલંબો વેસ્ટ ટર્મિનલની ક્ષમતા બમણી, હવે 3.2 મિલિયન TEUs
અદાણી પોર્ટ્સે USD 750 મિલિયનનું રોકાણ કર્યું; 18 મહિનામાં 20 લાખ TEUs કાર્ગો હેન્ડલ કરી નવો રેકોર્ડ
કોલંબો, 1 ઓક્ટોબર: અદાણી પોર્ટ્સ એન્ડ સ્પેશિયલ ઈકોનોમિક ઝોન (APSEZ)ના કોલંબો વેસ્ટ ઈન્ટરનેશનલ ટર્મિનલ (CWIT)ના બીજા તબક્કાના વિસ્તરણનું શ્રીલંકાના વડાપ્રધાન ડૉ. હરિની અમરસૂરિયાએ ઉદ્ઘાટન કર્યું છે. USD 750 મિલિયનના કુલ રોકાણથી થયેલા આ વિસ્તરણ બાદ ટર્મિનલની વાર્ષિક ક્ષમતા 1.6 મિલિયનથી વધીને 3.2 મિલિયન TEUs થઈ છે.
આ વિસ્તરણથી 2028 સુધીમાં કોલંબો બંદર મારફતે 13 મિલિયન TEUs કાર્ગો હેન્ડલ કરવાના શ્રીલંકાના લક્ષ્યાંકમાં CWITનો આશરે 25 ટકા હિસ્સો રહેવાની અપેક્ષા છે.
18 મહિનામાં 20 લાખ TEUs કાર્ગો હેન્ડલ
CWITએ 2024ના પ્રથમ જ વર્ષમાં 1 મિલિયન TEUs કાર્ગો હેન્ડલ કરીને ઝડપી ટર્મિનલ તરીકે રેકોર્ડ બનાવ્યો હતો. હવે કામગીરી શરૂ થયાના માત્ર 18 મહિનામાં 20 લાખ TEUs કાર્ગો હેન્ડલ કરીને કોલંબો બંદરના ઇતિહાસમાં વધુ એક મહત્વપૂર્ણ સિદ્ધિ હાંસલ કરી છે.
ત્રણ મોટા કન્ટેનર જહાજ એકસાથે લાંગરશે
APSEZના પૂર્ણકાલીન ડિરેક્ટર અને CEO અશ્વિની ગુપ્તાએ જણાવ્યું હતું કે વધારાની ક્ષમતા બાદ CWIT એકસાથે ત્રણ મોટા કન્ટેનર જહાજોને લાંગરવાની સુવિધા પૂરી પાડી શકશે. સંપૂર્ણ ઓટોમેશન અને ડીપ-વોટર ઈન્ફ્રાસ્ટ્રક્ચર સાથે ટર્મિનલ પૂર્વ-પશ્ચિમ વેપાર માર્ગ પર મહત્વપૂર્ણ ટ્રાન્સશિપમેન્ટ હબ તરીકે કોલંબોની સ્થિતિ વધુ મજબૂત કરશે.
તેમણે જણાવ્યું હતું કે USD 750 મિલિયનનું રોકાણ અને ટર્મિનલની ક્ષમતા બમણી થવી વૈશ્વિક શિપિંગ કંપનીઓના વિશ્વાસનું પ્રતિબિંબ છે. વિસ્તૃત ટર્મિનલ શ્રીલંકાના આયાત-નિકાસ કાર્ગોમાં પણ મહત્વપૂર્ણ યોગદાન આપશે.
3 હજારથી વધુ રોજગારીનું સર્જન
APSEZ, જ્હોન કિલ્સ હોલ્ડિંગ્સ અને શ્રીલંકા પોર્ટ્સ ઓથોરિટી દ્વારા 35 વર્ષના BOT કન્સેશન હેઠળ વિકસાવવામાં આવેલા CWITથી 3,000થી વધુ પ્રત્યક્ષ અને પરોક્ષ રોજગારીનું સર્જન થયું છે.
સંપૂર્ણ વીજળી સંચાલિત ટર્મિનલ
CWIT શ્રીલંકાનું પ્રથમ સંપૂર્ણ સ્વચાલિત ડીપ-વોટર કન્ટેનર ટર્મિનલ છે. ટર્મિનલ સંપૂર્ણ રીતે વીજળીથી સંચાલિત છે અને તેમાં શૂન્ય ટેલપાઇપ ઉત્સર્જન થાય છે. વિશ્વના મોટા કન્ટેનર જહાજોને સેવા આપવા સક્ષમ આ ટર્મિનલે અત્યાર સુધીમાં 1.7 કરોડ સુરક્ષિત કાર્ય કલાકો પૂર્ણ કર્યા છે.
