ટી. એમ. પટેલ ઇન્ટરનેશનલ સ્કૂલમાં ગ્રાન્ડપેરેન્ટ્સ ડેની ઉજવણી

સુરત: ટી. એમ. પટેલ ઇન્ટરનેશનલ સ્કૂલમાં ગ્રાન્ડપેરેન્ટ્સ ડેની વિશેષ ઉજવણી કરવામાં આવી હતી. આ પ્રસંગે વિદ્યાર્થીઓએ પોતાના દાદા-દાદી અને નાના-નાની સાથે પ્રેમ, લાગણી અને જૂની યાદોથી ભરપૂર પળો માણી હતી. સમગ્ર કાર્યક્રમ દરમિયાન બે પેઢીઓ વચ્ચેના સ્નેહ અને આત્મીય સંબંધની સુંદર ઝલક જોવા મળી હતી.

કાર્યક્રમની શરૂઆત પ્રાર્થનાથી કરવામાં આવી હતી. ત્યારબાદ પરંપરાગત તિલક વિધિ યોજાઈ, જેમાં વિદ્યાર્થીઓએ પોતાના દાદા-દાદી અને નાના-નાનીનું તિલક કરી પુષ્પો અર્પણ કર્યા હતા. વિદ્યાર્થીઓની વિશેષ નૃત્ય પ્રસ્તુતિએ કાર્યક્રમમાં ઉત્સાહ અને ઉમંગનો માહોલ સર્જ્યો હતો.

કાર્યક્રમનું મુખ્ય આકર્ષણ અંતાક્ષરી રહ્યું હતું, જેમાં ગ્રાન્ડપેરેન્ટ્સે ઉત્સાહપૂર્વક ભાગ લીધો હતો. ભજનો, 80ના દાયકાનાં લોકપ્રિય ગીતો અને જાણીતા સંવાદોએ જૂની યાદોને તાજી કરી હતી. ત્યારબાદ મનોરંજક રમતો અને વિશેષ ફૂટપ્રિન્ટ એક્ટિવિટીનું આયોજન કરવામાં આવ્યું, જેમાં વિદ્યાર્થીઓ અને તેમના ગ્રાન્ડપેરેન્ટ્સે સાથે મળીને યાદગાર પળોને સ્મૃતિરૂપે સાચવી હતી.

આ પ્રસંગે ટી. એમ. પટેલ ઇન્ટરનેશનલ સ્કૂલના ડિરેક્ટર અને પ્રિન્સિપાલ કે. મેક્સવેલ મનોહરએ જણાવ્યું હતું કે, “દાદા-દાદી અને નાના-નાની બાળકોના જીવનમાં સંસ્કાર, અનુભવ અને લાગણીસભર જોડાણનો મહત્વપૂર્ણ આધાર હોય છે. આવા કાર્યક્રમો વિદ્યાર્થીઓને તેમના પ્રત્યે પ્રેમ અને આભાર વ્યક્ત કરવાની તક આપે છે અને પેઢીઓ વચ્ચેના સંબંધોને વધુ મજબૂત બનાવે છે.”

કાર્યક્રમનું સમાપન ઉત્સાહભર્યા ગરબા રાઉન્ડ સાથે થયું હતું. સંગીત, નૃત્ય અને હાસ્યથી ભરપૂર આ ઉજવણી વિદ્યાર્થીઓ તથા તેમના ગ્રાન્ડપેરેન્ટ્સ માટે યાદગાર બની રહી હતી.