લિંબાયતમાં ઝણકાર નવરાત્રીમાં પરેશ પટેલે ખેલૈયાઓનો વધાર્યો ઉત્સાહ
માં અંબેના દર્શન કરી ગરબા મહોત્સવમાં જોડાયા ભાજપના સુરત શહેર અધ્યક્ષ પરેશ પટેલ, મેયર માયાબેન માવાણી સહિતના મહાનુભાવો રહ્યા ઉપસ્થિત
સુરત। શહેરના લિંબાયત વિસ્તારમાં યોજાયેલી ઝણકાર નવરાત્રીમાં ખેલૈયાઓમાં ભારે ઉત્સાહ અને ઉમંગ જોવા મળ્યો હતો. ધારાસભ્ય સંગીતા પાટીલની ઉપસ્થિતિમાં ગરબાની રમઝટ જામી હતી. માં અંબેની આરાધના અને ગરબાના તાલે સમગ્ર વાતાવરણ ભક્તિમય બની ગયું હતું.
આ પ્રસંગે ભારતીય જનતા પાર્ટીના સુરત મહાનગર અધ્યક્ષ પરેશભાઈ પટેલે માં અંબેના દર્શન કરી ખેલૈયાઓનો ઉત્સાહ વધાર્યો હતો. કાર્યક્રમમાં સુરત મહાનગરપાલિકાનાં મેયર માયાબેન માવાણી, ધારાસભ્ય અરવિંદભાઈ રાણા, સુરત મહાનગરપાલિકાની સ્ટેન્ડિંગ કમિટીના ચેરમેન રાજનભાઈ પટેલ સહિતના પદાધિકારીઓ, કોર્પોરેટરો અને મોટી સંખ્યામાં ભાજપના કાર્યકરો ઉપસ્થિત રહ્યા હતા.
નવરાત્રીના પાવન પર્વ નિમિત્તે ખેલૈયાઓ પરંપરાગત પોશાકમાં સજ્જ થઈને માતાજીની આરાધના સાથે ગરબે ઘૂમ્યા હતા. ગરબાનાં તાલ અને સંગીતના સૂરોએ ઉત્સવની રોનકમાં વધારો કર્યો હતો. યુવાનો અને મહિલાઓ સહિત મોટી સંખ્યામાં ગરબાપ્રેમીઓએ ઉત્સાહપૂર્વક ભાગ લીધો હતો.
ઝણકાર નવરાત્રીમાં મહાનુભાવોની ઉપસ્થિતિએ ખેલૈયાઓમાં વિશેષ ઉત્સાહનો સંચાર કર્યો હતો. નવરાત્રી ગુજરાતની સંસ્કૃતિ, પરંપરા અને સામાજિક એકતાનું પ્રતીક છે. લિંબાયત વિસ્તારમાં યોજાયેલી આ ઉજવણીમાં ભક્તિ, ઉત્સાહ અને સાંસ્કૃતિક એકતાનો સુંદર સંગમ જોવા મળ્યો હતો.
