સુરતમાં દશેરાએ 80 ફૂટ ઊંચા રાવણનું દહન થશે
આગ્રાના 15 મુસ્લિમ કારીગરો રાવણ, કુંભકર્ણ અને મેઘનાદનાં પૂતળાં બનાવવામાં વ્યસ્ત; રાવણની આંખોમાંથી નીકળશે આગની જ્વાળાઓ, નાભિમાંથી થશે અમૃતવર્ષા
સુરત: શહેરમાં દશેરાના પર્વ નિમિત્તે આ વર્ષે 80 ફૂટ ઊંચા રાવણના પૂતળાનું દહન કરવામાં આવશે. શ્રી આદર્શ રામલીલા ટ્રસ્ટ દ્વારા વેસુ સ્થિત વી.આઈ.પી. રોડ પર આવેલા એસએમસી મેદાનમાં આયોજિત કાર્યક્રમની તૈયારીઓ જોરશોરથી ચાલી રહી છે. રાવણ, કુંભકર્ણ અને મેઘનાદનાં વિશાળ પૂતળાં તૈયાર કરવા માટે ઉત્તર પ્રદેશના આગ્રાથી આવેલા 15 જેટલા કારીગરો દિવસ-રાત મહેનત કરી રહ્યા છે. ખાસ વાત એ છે કે હિન્દુઓના પ્રમુખ પર્વ દશેરા માટે રાવણનાં પૂતળાં મુસ્લિમ કારીગરો બનાવી રહ્યા છે, જે કોમી એકતા અને સામાજિક સૌહાર્દનું ઉત્તમ ઉદાહરણ છે.
માનવ શરીર જેવી રચના, રાજાશાહી પોશાકમાં દેખાશે રાવણ
આગ્રાથી પોતાની ટીમ સાથે આવેલા અસગર અલીએ જણાવ્યું કે તેમના પરિવારમાં રાવણનાં પૂતળાં બનાવવાની પરંપરા ચોથી પેઢીથી ચાલી રહી છે. જોકે, ગુજરાતમાં પ્રથમ વખત તેમને પોતાની કળા રજૂ કરવાની તક મળી છે. આ વર્ષે રાવણનું પૂતળું 80 ફૂટ ઊંચું, જ્યારે કુંભકર્ણ અને મેઘનાદનાં પૂતળાં 60-60 ફૂટ ઊંચાં બનાવવામાં આવી રહ્યાં છે. લંકાનું કદ પણ અગાઉ કરતાં મોટું રાખવામાં આવ્યું છે.
આ વખતે રાવણને કાર્ટૂન જેવી આકૃતિને બદલે વાસ્તવિક માનવ શરીર જેવો દેખાવ આપવામાં આવી રહ્યો છે. તેના ખભા, ધડ અને ચહેરાને વિશેષ ડાઈ મશીનોની મદદથી તૈયાર કરવામાં આવ્યા છે. રાવણને રાજાશાહી પોશાક, કાળી મોજડી, ધોતી અને યુદ્ધના મેદાનમાં પહેરવામાં આવતા સુરક્ષા કવચથી સજાવવામાં આવશે.
રિમોટથી ફરશે છત્રી, આંખોમાંથી નીકળશે આગની જ્વાળાઓ
આ વર્ષે રાવણના પૂતળામાં અનેક ટેકનિકલ આકર્ષણો જોવા મળશે. દહન દરમિયાન ઇલેક્ટ્રિક રિમોટની મદદથી તેના માથા પરની છત્રી ફરશે. તેની આંખોમાંથી આગની જ્વાળાઓ, મોઢામાંથી અંગારા અને કાનમાંથી ધુમાડો નીકળશે. નાભિમાંથી અમૃતવર્ષા થતી હોય તેવું વિશેષ દૃશ્ય પણ રજૂ કરવામાં આવશે. આ ઉપરાંત, પૂતળાંમાં વિશેષ અવાજ કરતા ગોળા લગાવવામાં આવી રહ્યા છે, જેનો અવાજ દૂર સુધી સંભળાશે.
