સુરત આંતરરાષ્ટ્રીય એરપોર્ટ પર CISFના જવાનોએ તાત્કાલિક CPR આપી ફરજ પર કાર્યરત કર્મચારીને આપ્યું નવજીવન
હૃદયરોગનો હુમલાથી બેભાન થયેલા કર્મચારીને ત્વરિત પ્રાથમિક સારવાર આપી માનવતાનું ઉત્તમ ઉદાહરણ પૂરું પાડ્યું
સુરત આંતરરાષ્ટ્રીય એરપોર્ટના એપ્રન વિસ્તારમાં ફરજ દરમિયાન સ્ટીમહાઉસ ઇન્ડિયા લિમી.સંસ્થાના કર્મચારીશ્રી મનોજભાઈ પવારને અચાનક હૃદયરોગનો હુમલો) આવતાં તેઓ સ્ટાફ ગેટ નજીક ઢળી પડ્યા હતા અને બેભાન થઈ ગયા હતા.
આ ઘટનાની જાણ થતાં જ પ્રોફાઈલિંગ ડ્યુટી પર તેનાત સીઆઈએસએફ(CISF) ના હેડ કોન્સ્ટેબલ ચૌધરી સંજય કુમાર અંબાલાલ તાત્કાલિક ઘટનાસ્થળે પહોંચી ગયા હતા. તેમણે એક ક્ષણ પણ ગુમાવ્યા વિના પ્રભાવિત કર્મચારીને પ્રાથમિક તબીબી સહાય આપવાનું શરૂ કર્યું હતું અને સ્થળ પર જ CPR આપવાનું શરૂ કર્યું હતું. આ દરમિયાન સ્થળ પર હાજર અન્ય CISFના જવાનોએ પણ ત્વરિત મદદ અને જરૂરી સહયોગ પૂરો પાડ્યો હતો.CISF જવાનોની ત્વરિત પ્રતિક્રિયા, સજાગતા અને સમયસૂચકતાને પરિણામે કર્મચારીની સ્થિતિમાં સુધારો થયો હતો. ત્યારબાદ તેમને વધુ તબીબી સારવાર મળી રહે તે માટેની જરૂરી વ્યવસ્થા કરવામાં આવી હતી.
હેડ કોન્સ્ટેબલ ચૌધરી સંજય કુમાર અંબાલાલ અને CISFની ટીમે દર્શાવેલી આ તત્પરતા અને માનવીય સંવેદનશીલતા CISFની કર્તવ્યનિષ્ઠા, સતર્કતા અને સેવાભાવનાનું ઉત્કૃષ્ટ ઉદાહરણ છે. કટોકટીની સ્થિતિમાં CISFના જવાનો દ્વારા કરવામાં આવેલી આ કામગીરી માનવ જીવનની સુરક્ષા પ્રત્યેની તેમની પ્રતિબદ્ધતા દર્શાવે છે.
