સુરત: AMNS ઇન્ટરનેશનલ સ્કૂલે ફરી એકવાર રમતગમત ક્ષેત્રે પોતાની પ્રતિભાનો પરિચય આપતાં ગુજરાત સરકારની ફ્લેગશિપ રમતગમત પહેલ ખેલ મહાકુંભ 2025-26ના જિલ્લા સ્તરીય ફાઇનલમાં ઓવરઓલ રનર-અપનો ખિતાબ મેળવ્યો છે.
સ્કૂલના વિદ્યાર્થીઓએ ટુર્નામેન્ટની કુલ પોઇન્ટ સિસ્ટમ હેઠળ વિવિધ રમતોમાં ઉત્કૃષ્ટ દેખાવ કર્યો હતો. એથ્લેટિક્સ, સ્વિમિંગ, બાસ્કેટબોલ, ફૂટબોલ, કરાટે, સ્કેટિંગ, લોન ટેનિસ, બેડમિન્ટન અને ટેબલ ટેનિસ જેવી સ્પર્ધાઓમાં વિદ્યાર્થીઓએ શાનદાર પ્રદર્શન કરીને સ્કૂલને ગૌરવ અપાવ્યું હતું.
વિદ્યાર્થીઓના ઉત્કૃષ્ટ દેખાવને માન્યતા આપતાં રાજ્ય સરકારે તેમને વ્યક્તિગત રોકડ પુરસ્કારો એનાયત કર્યા હતા. ઉપરાંત AMNS ઇન્ટરનેશનલ સ્કૂલને પણ રૂ.90 હજારનો રોકડ પુરસ્કાર આપવામાં આવ્યો હતો.
સ્કૂલ માટે આ સિદ્ધિ રમતગમત ક્ષેત્રે સતત મળી રહેલી સફળતાઓમાં વધુ એક મહત્વપૂર્ણ ઉમેરો બની છે. છેલ્લા કેટલાક વર્ષોમાં પણ AMNS ઇન્ટરનેશનલ સ્કૂલે વિવિધ રાજ્ય અને જિલ્લા સ્તરની રમતગમત સ્પર્ધાઓમાં નોંધપાત્ર સફળતા મેળવી છે.
આ પ્રસંગે સ્કૂલના આચાર્ય સુનીતા મટૂએ જણાવ્યું હતું કે, “આ સિદ્ધિ અમારા વિદ્યાર્થીઓ અને કોચના સમર્પણ, શિસ્ત અને રમતગમત પ્રત્યેની પ્રતિબદ્ધતાનું પ્રતિબિંબ છે. AMNS ઇન્ટરનેશનલ સ્કૂલમાં અમે માનીએ છીએ કે રમતગમત વિદ્યાર્થીઓમાં આત્મવિશ્વાસ, વ્યક્તિત્વ અને નેતૃત્વના ગુણો વિકસાવવામાં મહત્વની ભૂમિકા ભજવે છે. આ સન્માન અમને સર્વાંગી વિકાસ માટે સતત પ્રેરણા આપતું રહેશે.”
