સુરતના ટેક્સટાઇલ ઉદ્યોગમાં ટેક્નોલોજી અપગ્રેડેશન, ઓટોમેશન અને આધુનિક મશીનરી માટેનું સૌથી વિશ્વસનીય પ્લેટફોર્મ બની ચૂકેલા ‘સીટેક્ષ-2026’ને દેશભરમાંથી જબરદસ્ત પ્રતિસાદ સાંપડી રહ્યો છે. ધી સધર્ન ગુજરાત ચેમ્બર ઓફ કોમર્સ એન્ડ ઇન્ડસ્ટ્રી (SGCCI) અને સધર્ન ગુજરાત ટ્રેડ એન્ડ ઇન્ડસ્ટ્રીઝ ડેવલપમેન્ટ સેન્ટરના સંયુક્ત ઉપક્રમે સરસાણા સ્થિત કન્વેન્શન સેન્ટર ખાતે આયોજિત ત્રિ-દિવસીય એક્સ્પોમાં શરૂઆતના બે દિવસમાં જ 16,500થી વધુ અધિકૃત બાયર્સ અને મુલાકાતીઓએ મુલાકાત લઈ નવો વિક્રમ સર્જ્યો છે.
આધુનિક મશીનરી તરફ ઉદ્યોગોનો ઝોક વધ્યો: અશોક જીરાવાલા
ચેમ્બર પ્રમુખ શ્રી અશોક જીરાવાલાએ જણાવ્યું હતું કે, “સીટેક્ષ-2026માં ટેક્સટાઇલ મેન્યુફેક્ચરિંગ ક્ષેત્રની ગ્લોબલ ટેક્નોલોજી, હાઇ-સ્પીડ લૂમ્સ અને ઓટોમેટેડ સાધનો પ્રદર્શિત કરાયા છે. પ્રદર્શનના પ્રથમ દિવસે 4,500 મુલાકાતીઓ નોંધાયા હતા, જ્યારે બીજા દિવસે આ સંખ્યામાં ધરખમ ઉછાળો જોવા મળ્યો હતો અને એક જ દિવસમાં 12,000 જેટલા બાયર્સ-વિઝિટર્સ ઉમટી પડ્યા હતા. આમ, માત્ર બે દિવસમાં કુલ 16,500 ડેલિગેટ્સે મુલાકાત લીધી છે. મુલાકાતીઓનો આ પ્રવાહ સાબિત કરે છે કે સ્થાનિક અને રાષ્ટ્રીય સ્તરે ઉદ્યોગકારો હવે પરંપરાગત એકમોને હાઇ-ટેક ઓટોમેશન તરફ લઈ જવા ઉત્સુક છે.”
તેમણે ઉમેર્યું કે દેશભરમાંથી આવેલા અગ્રણી બાયર્સ સાથે સીધા સંપર્કને કારણે એક્ઝિબિટર્સને મોટા બિઝનેસ સોદા અને લાંબા ગાળાના જોડાણો સ્થાપિત કરવાની સુવર્ણ તક મળી છે, જેનો વ્યાપક લાભ સુરતના સમગ્ર ટેક્સટાઇલ ઇકોસિસ્ટમને મળશે.
કાશ્મીરથી કન્યાકુમારી અને આંદામાન સુધીના ઉદ્યોગકારોની ઉપસ્થિતિ:
‘સીટેક્ષ-2026’માં કેવળ સુરત કે ગુજરાત જ નહીં, પરંતુ સમગ્ર ભારતના ખૂણે-ખૂણેથી ટેક્સટાઇલ અને ગારમેન્ટિંગ હબના અગ્રણી ઉદ્યોગકારો ઉપસ્થિત રહ્યા છે.
ખાસ કરીને આંદામાન-નિકોબાર (બામ્બુફ્લેટ અને ગ્રેનચર્મા) જેવા દૂરના વિસ્તારો ઉપરાંત લુધિયાણા, અમૃતસર, પાણીપત, ભીલવાડા, જોધપુર, વારાણસી, ઇટાવા, પટના, મધુપુર, કોલકાતા, પશ્ચિમ બંગાળ, મુંબઈ, પુણે, ઇચલકરંજી, માલેગાંવ, કોલ્હાપુર, સોલાપુર, છત્રપતિ સંભાજીનગર, નાશિક, હૈદરાબાદ, બેંગ્લોર, ચેન્નાઈ, તિરુપુર, કોઈમ્બતુર, ઇરોડ, સેલવાસ, દાદરા નગર હવેલી, ઇન્દોર અને નવી દિલ્હી સહિતના ઔદ્યોગિક કેન્દ્રોમાંથી વેપારી પ્રતિનિધિમંડળોએ પ્રદર્શન નિહાળી મશીનરીની ખરીદી માટે ગંભીર પૂછપરછ હાથ ધરી હતી.
દેશના વિવિધ ભાગોમાંથી આવેલા ઉદ્યોગકારો માટે એક જ છત નીચે વિશ્વસ્તરીય મશીનરી અને ઇનોવેશન્સને પ્રત્યક્ષ જોવાની આ ઉત્તમ તક બની રહી છે. આ ભવ્ય પ્રતિસાદે સુરતને માત્ર કાપડ ઉત્પાદન કેન્દ્ર તરીકે જ નહીં, પરંતુ ટેક્સટાઇલ ટેક્નોલોજી અને મશીનરી એડોપ્શનના રાષ્ટ્રીય કેન્દ્ર તરીકે પુનઃ સ્થાપિત કર્યું છે.
