દિવ્યાંગને સ્ટોલ આપી આત્મનિર્ભર બનાવવાનો પ્રયાસ

સુરત: ઉધનાના ચીકુવાડી વિસ્તારમાં જરૂરિયાતમંદ પરિવારના દિવ્યાંગ સભ્યને સ્વરોજગાર સાથે જોડીને આત્મનિર્ભર બનાવવાની દિશામાં સાકેત ગ્રુપ દ્વારા સેવાકીય પહેલ કરવામાં આવી હતી. ‘સેવા હી લક્ષ્ય’ના સંકલ્પ હેઠળ શહેર ભાજપના પૂર્વ ઉપાધ્યક્ષ છોટુ પાટીલની પ્રેરણાથી તથા સ્ટીમ હાઉસના સહયોગથી લાભાર્થી પરિવારને વ્યવસાય શરૂ કરવા માટે સ્ટોલ ભેટ આપવામાં આવ્યો હતો.

છોટુ પાટીલે જણાવ્યું હતું કે, જરૂરિયાતમંદ પરિવારની પરિસ્થિતિને ધ્યાનમાં રાખીને સાકેત ગ્રુપના અધ્યક્ષ સાંવરલાલજી બુધિયાજીની પ્રેરણાથી સ્ટીમ હાઉસના સહયોગથી સ્ટોલ ઉપલબ્ધ કરાવવામાં આવ્યો છે. માત્ર આર્થિક સહાય આપવાને બદલે જરૂરિયાતમંદને રોજગારની તક આપીને આત્મનિર્ભર બનાવવો વધુ અસરકારક સેવાકાર્ય છે. આ જ હેતુથી દિવ્યાંગ સભ્યને વ્યવસાય માટે સ્ટોલ આપવામાં આવ્યો છે.

તેમણે વધુમાં જણાવ્યું કે, આવી પહેલ સમાજના વંચિત અને જરૂરિયાતમંદ વર્ગના જીવનમાં સકારાત્મક પરિવર્તન લાવી શકે છે. સન્માન સાથે રોજગારની તક મળવાથી દિવ્યાંગ વ્યક્તિનો આત્મવિશ્વાસ વધશે અને પરિવારની આર્થિક સ્થિતિ પણ મજબૂત બનશે.

કાર્યક્રમમાં વોર્ડ નં. 24ના કોર્પોરેટર તથા સુરત મહાનગરપાલિકાની ડ્રેનેજ કમિટીના ચેરમેન રવિન્દ્ર ખૈરનાર, કોર્પોરેટર કેયૂર પટેલ, ભાવના શાહ, પંકજ જાધવ સહિત વોર્ડના હોદ્દેદારો, સોસાયટીના રહેવાસીઓ તથા લાભાર્થી પરિવારના સભ્યો ઉપસ્થિત રહ્યા હતા.

કાર્યક્રમ દરમિયાન જરૂરિયાતમંદ પરિવારોને શક્ય તમામ સહયોગ આપવા અને સમાજના વંચિત વર્ગને મુખ્ય પ્રવાહ સાથે જોડવાના સંકલ્પને પુનરોચ્ચાર કરવામાં આવ્યો હતો. ઉપસ્થિત લોકોએ દિવ્યાંગ સભ્યને રોજગાર દ્વારા આત્મનિર્ભર બનાવવાની આ પહેલને બિરદાવી હતી.