સુરતઃ ફેડરેશન ઓફ સુરત ટ્રેડ એન્ડ ટેક્સટાઇલ એસોસિએશન (FOSTTA) દ્વારા 9 ઓગસ્ટ 2026ના રોજ ડુમસ રોડ સ્થિત અદ્વિતા હોલ ખાતે વાર્ષિક સાધારણ સભા અને વેપાર વિકાસ મહોત્સવનું ભવ્ય આયોજન કરવામાં આવ્યું હતું. કાર્યક્રમનો પ્રારંભ દીપ પ્રાગટ્યથી થયો હતો.
કાર્યક્રમમાં FOSTTAના સહસચિવ ગિરીશ મિત્તલે સ્વાગત પ્રવચન કરી ઉપસ્થિત મહેમાનો, હોદ્દેદારો, વિવિધ વેપારી સંગઠનોના પ્રતિનિધિઓ તથા વેપારીઓનું સ્વાગત કર્યું હતું.
આવક-જાવકનો હિસાબ રજૂ, પુનીત ગર્ગની ઓડિટર તરીકે નિમણૂક
FOSTTAના ખજાનચી નાનાલાલ રાઠોડે સંસ્થાની આવક-જાવકનો વિગતવાર અહેવાલ રજૂ કરી સંસ્થાની નાણાકીય કામગીરી અંગે સભાને માહિતગાર કરી હતી. નાણાકીય વર્ષ 2026-27 માટે CA પુનીત ગર્ગની ઓડિટર તરીકે નિમણૂક કરવામાં આવી હતી.
2026થી 2029 માટે નવી કાર્યકારિણીની બિનહરીફ વરણી
ચૂંટણી અધિકારીઓ દ્વારા વર્ષ 2026થી 2029 સુધી બિનહરીફ ચૂંટાયેલા હોદ્દેદારોની માહિતી સભા સમક્ષ રજૂ કરવામાં આવી હતી. આ દરમિયાન FOSTTAના નવા પ્રમુખ હંસરાજ જૈન, મહામંત્રી દિનેશ કટારિયા અને ખજાનચી નીરજ અગ્રવાલ સહિત સમગ્ર નવી કાર્યકારિણીનું સ્વાગત અને સન્માન કરવામાં આવ્યું હતું.
સાથે જ વર્ષ 2023થી 2026 દરમિયાન સેવા આપીને નિવૃત્ત થયેલા હોદ્દેદારોનું પણ સન્માન કરવામાં આવ્યું હતું. સંસ્થા અને વેપારી હિતમાં તેમના યોગદાન બદલ આભાર વ્યક્ત કરવામાં આવ્યો હતો.
યુવા પેઢીને વેપાર અને ઉદ્યોગસાહસિકતાની દિશા આપવાનો પ્રયાસ
FOSTTA દ્વારા આયોજિત વેપાર વિકાસ મહોત્સવનો મુખ્ય હેતુ નવી પેઢીને વેપાર, ઉદ્યોગસાહસિકતા, નવીનતા અને સફળતાની નવી તકો અંગે માહિતગાર કરવાનો તથા તેમને યોગ્ય દિશા અને પ્રેરણા આપવાનો હતો.
આ અંતર્ગત ‘સફળતાનો સંવાદ’ કાર્યક્રમનું આયોજન કરવામાં આવ્યું હતું. જેમાં વિવિધ ક્ષેત્રોમાં સફળતા મેળવનારા ઉદ્યોગસાહસિકોએ પોતાની સફળતાની સફર, સંઘર્ષ અને અનુભવો ઉપસ્થિત વેપારીઓ તથા યુવાનો સાથે શેર કર્યા હતા.
સફળ ઉદ્યોગસાહસિકોએ શેર કરી સફળતાની સફર
કાર્યક્રમમાં એપલ ગ્રુપના દીપક સેઠા, સિગ્નેચર મશીનના અશોક અડવાણી, XYXXના ફાઉન્ડર તથા ફોર બટન ગ્રુપના યોગેશ કાબરા અને રિગાન ફેશન પ્રાઇવેટ લિમિટેડના કરિશ્મા ધનકાનીએ પોતાના અનુભવો રજૂ કર્યા હતા.
તેમના અનુભવો દ્વારા ઉપસ્થિત યુવાનો અને વેપારીઓને નવી વિચારસરણી, નવીનતા, મહેનત, સતત પ્રયાસ અને વેપારમાં નવી તકો અપનાવવા માટે પ્રેરણા મળી હતી.
ડેપ્યુટી CM હર્ષ સંઘવીના હસ્તે FOSTTAના કાર્યકાળની વિશેષ પુસ્તકનું વિમોચન
કાર્યક્રમમાં વિશિષ્ટ અતિથિ તરીકે ગુજરાતના માનનીય નાયબ મુખ્યમંત્રી હર્ષ સંઘવી ઉપસ્થિત રહ્યા હતા. તેમના હસ્તે FOSTTAના વર્ષ 2023થી 2026ના કાર્યકાળ દરમિયાન સંગઠન દ્વારા કરવામાં આવેલા વિવિધ કાર્યો, સિદ્ધિઓ, વેપારી હિતમાં કરાયેલા પ્રયાસો અને મુખ્ય પહેલોને સંકલિત કરીને તૈયાર કરવામાં આવેલી વિશેષ પુસ્તકનું વિમોચન કરવામાં આવ્યું હતું. આ પુસ્તક FOSTTAની સેવા, પ્રયાસો અને વેપારી હિતમાં કરવામાં આવેલા કાર્યોનો દસ્તાવેજ બની રહેશે.
ટેક્સટાઇલ માર્કેટમાં આર્થિક ગેરરીતિ રોકવા સરકાર-પોલીસના પગલાંની પ્રશંસા
FOSTTAના ચેરમેન કૈલાશ હાકિમે પોતાના સંબોધનમાં સરકાર અને પોલીસ પ્રશાસનનો આભાર વ્યક્ત કર્યો હતો. તેમણે ટેક્સટાઇલ માર્કેટમાં થઈ રહેલી આર્થિક ગેરરીતિઓને રોકવા માટે લેવામાં આવેલા પગલાંને પ્રશંસનીય ગણાવ્યા હતા.
તેમણે નવી ટેક્સટાઇલ પોલિસી અંગે પણ ઉપસ્થિત વેપારીઓને માહિતી આપી હતી. સાથે જ FOSTTA દ્વારા તૈયાર કરવામાં આવેલી એપ અંગે માહિતી આપતા જણાવ્યું હતું કે, જો તમામ વેપારીઓ તેનો ઉપયોગ કરે તો સુરતના ટેક્સટાઇલ માર્કેટના વિકાસ અને વેપાર માટે આ એપ મહત્વપૂર્ણ સાબિત થઈ શકે છે.
તેમણે વધુમાં જણાવ્યું હતું કે, એપના વ્યાપક ઉપયોગથી વેપારીઓ સાથે સંકળાયેલી ગેરરીતિઓ પર અંકુશ લાવી શકાય અને રેફરન્સનું મજબૂત સિસ્ટમ તૈયાર કરી શકાય છે.
મોટી સંખ્યામાં વેપારીઓ અને વિવિધ સંગઠનોના પ્રતિનિધિઓ ઉપસ્થિત
કાર્યક્રમમાં અનેક ગણમાન્ય મહેમાનો, FOSTTAના હોદ્દેદારો, ડિરેક્ટરો, મોટી સંખ્યામાં ટેક્સટાઇલ વેપારીઓ તથા વિવિધ વેપારી સંગઠનોના પ્રતિનિધિઓ ઉપસ્થિત રહ્યા હતા.
FOSTTA દ્વારા આયોજિત આ વાર્ષિક સાધારણ સભા અને વેપાર વિકાસ મહોત્સવ સંસ્થાની પારદર્શિતા, વેપારી હિતો પ્રત્યેની પ્રતિબદ્ધતા તથા નવી પેઢીને વેપાર ક્ષેત્રે આગળ વધારવાની દિશામાં મહત્વપૂર્ણ અને પ્રેરણાદાયી પહેલ સાબિત થયો હતો.
