લાજપોર મધ્યસ્થ જેલ ખાતે ‘મુલાકાત સે ન્યાય તક’ અભિયાન અંતર્ગત ‘લીગલ એઇડ હેલ્પ ડેસ્ક’નો શુભારંભ

સુરત: સુરતની લાજપોર મધ્યસ્થ જેલ ખાતે એક મહત્વપૂર્ણ કાનૂની સેવાનો પ્રારંભ કરવામાં આવ્યો છે. કેદીઓ અને તેમના પરિવારજનોને જેલના ઉંબરે જ કાનૂની માર્ગદર્શન મળી રહે તે હેતુથી ‘લીગલ એઇડ હેલ્પ ડેસ્ક’ નું ઉદ્ઘાટન જિલ્લા કાનૂની સેવા સત્તા મંડળ, સુરતના સચિવ ડી. આર. જોષીના હસ્તે કરવામાં આવ્યું હતું. નેશનલ લીગલ સર્વિસીસ ઓથોરિટી (NALSA) ના માર્ગદર્શન હેઠળ શરૂ કરવામાં આવેલા ‘મુલાકાત સે ન્યાય તક’ અભિયાન અંતર્ગત આ વિશેષ પહેલ હાથ ધરવામાં આવી છે.

આ પ્રસંગે સુરત જેલના વડા અધિકારી ઉપસ્થિત રહ્યા હતા. આ સાથે જ Legal Aid Defense Counsel , લાજપોર મધ્યસ્થ જેલના અન્ય વરિષ્ઠ અધિકારીઓ અને પેરા લીગલ વોલેન્ટિયર્સ પણ મોટી સંખ્યામાં હાજર રહ્યા હતા.

આ અવસરે  ડી.આર.જોષીએ જણાવ્યું હતું કે, “ન્યાય એ માત્ર બંધારણીય અધિકાર નથી, પરંતુ તે દરેક નાગરિક સુધી પહોંચવો જોઈએ. આ હેલ્પ ડેસ્ક શરૂ થવાથી ગરીબ અને વંચિત પરિવારો માટે આશાનું કિરણ બનશે.” માહિતીના અભાવે ન્યાય મેળવવામાં વિલંભ થાય છે તે નિવારી શકાશે. કેદીઓના પરિવારજનોને કેસની અપીલ, અપડેટ જેવી તમામ માહિતી વિનામૂલ્યે મળી રહેશે.

હેલ્પ ડેસ્ક દ્વારા જેલમાં મુલાકાતે આવતા પરિવારોને તેમના સ્વજનના કેસની વર્તમાન સ્થિતિ, જામીનની અરજી માટે જરૂરી દસ્તાવેજો અને અપીલ કરવાના અધિકારો વિશે સ્થળ પર જ જાણકારી આપવામાં આવશે. કાર્યક્રમમાં ઉપસ્થિત LADC (લીગલ એઇડ ડિફેન્સ કાઉન્સેલ) ના વકીલો દ્વારા આર્થિક રીતે નબળા કેદીઓને મફત અને ગુણવત્તાયુક્ત કાનૂની બચાવ પક્ષની સેવાઓ કેવી રીતે મેળવવી તે અંગે માર્ગદર્શન પૂરું પાડવામાં આવ્યું હતું.

હેલ્પ ડેસ્ક માત્ર કાનૂની મદદ પૂરતું સીમિત ન રહેતા, મુલાકાતીઓ માટે પીવાનું પાણી, બેસવાની વ્યવસ્થાઓ ઉપલબ્ધ કરવામાં આવી છે. જેલ વિઝિટિંગ એડવોકેટ્સ અને પેરા લીગલ વોલેન્ટિયર્સ દર મુલાકાત સમયે હાજર રહીને ‘ફેમિલી ઈન્ટરેક્શન શીટ’ દ્વારા ડેટા એકત્રિત કરશે, જેથી કોઈ પણ કેદી માહિતીના અભાવે જેલમાં ન રહી જાય.