એલ.પી. સવાણી ગ્રુપ ઓફ સ્કૂલ્સનો CBSE ધોરણ 10માં 100% પરિણામ
50 વિદ્યાર્થીઓ A1 ગ્રેડમાં , 96 વિદ્યાર્થીઓ A2 ગ્રેડમાં અને 10 વિદ્યાર્થીઓએ 100 માંથી 100 ગુણ મેળવી રચ્યો નવો ઇતિહાસ
સુરત: એલ.પી. સવાણી ગ્રુપ ઓફ સ્કૂલ્સે CBSE ધોરણ 10 બોર્ડ પરીક્ષા (2025–26) માં ઉત્તમ અને ગૌરવપૂર્ણ પરિણામ પ્રાપ્ત કર્યું છે. શાળાએ 100% પરિણામ સાથે પોતાની શૈક્ષણિક શ્રેષ્ઠતાની પરંપરા યથાવત રાખી છે.
આ વર્ષે જાહેર થયેલા પરિણામમાં 50 વિદ્યાર્થીઓએ A1 ગ્રેડ પ્રાપ્ત કરીને શાળાનું ગૌરવ વધાર્યું છે, જ્યારે 96 વિદ્યાર્થીઓએ A2 ગ્રેડ મેળવી નોંધપાત્ર સફળતા મેળવી છે. ખાસ નોંધનીય બાબત એ છે કે 10 વિદ્યાર્થીઓએ વિવિધ વિષયોમાં 100 માંથી 100 ગુણ મેળવી ઉત્તમ પ્રદર્શન કર્યું છે, જે શાળાની ગુણવત્તાસભર શિક્ષણ પ્રણાલીની સાક્ષી આપે છે.
શાળા સંચાલક મંડળના ચેરમેન માવજીભાઈ સવાણી, વાઇસ ચેરમેન ડૉ. ધર્મેન્દ્ર સવાણી અને ડિરેક્ટર પૂર્વીબેન સવાણી દ્વારા તમામ વિદ્યાર્થીઓને હાર્દિક અભિનંદન પાઠવવામાં આવ્યા છે. સાથે જ શિક્ષકમંડળની અથાગ મહેનત તથા વાલીઓના સતત સહકારને પણ બિરદાવવામાં આવ્યો છે. શાળા પરિવાર તમામ વિદ્યાર્થીઓના ઉજ્જવળ ભવિષ્ય માટે હાર્દિક શુભેચ્છાઓ પાઠવે છે.
