ટી.એમ. પટેલ ઇન્ટરનેશનલ સ્કૂલમાં ‘ગુડ ટચ અને બેડ ટચ’વિષય પર જાગૃતિ સત્ર

સુરત: ટી.એમ. પટેલ ઇન્ટરનેશનલ સ્કૂલ વિદ્યાર્થીઓની સુરક્ષા અને સુખાકારીને કેન્દ્રમાં રાખીને ‘ગુડ ટચ અને બેડ ટચ’ વિષય પર એક મહત્વપૂર્ણ જાગૃતિ સત્રનું આયોજન કર્યું હતું. ધોરણ 1 અને 2 ના વિદ્યાર્થીઓ માટે ખાસ તૈયાર કરાયેલા આ સત્રનો હેતુ બાળકોને નાની ઉંમરે જ વ્યક્તિગત સુરક્ષા અંગે સમજ આપવાનો હતો.

સ્કૂલના કાઉન્સેલર દ્વારા યોજાયેલા આ સત્રમાં બાળકોને સરળ અને ઉંમર મુજબ યોગ્ય ભાષામાં સુરક્ષિત અને અસુરક્ષિત સ્પર્શ વચ્ચેનો ફરક સમજાવવામાં આવ્યો હતો. શૈક્ષણિક વિડિયો દ્વારા બાળકોને વ્યક્તિગત સીમાઓ, સુરક્ષા નિયમો અને આત્મરક્ષા વિશે માહિતગાર કરવામાં આવ્યા.

સત્ર દરમિયાન બાળકોને અસહજ પરિસ્થિતિમાં કેવી રીતે પ્રતિક્રિયા આપવી અને તરત જ વિશ્વાસપાત્ર વ્યક્તિની મદદ લેવાની જરૂરિયાત વિશે પૂરતું માર્ગદર્શન આપવામાં આવ્યું. લાઇવ ડેમો અને ઇન્ટરએક્ટિવ પ્રવૃત્તિઓ દ્વારા ‘સેફ ઝોન’ અને વિશ્વાસપાત્ર લોકોની ઓળખ કઈ રીતે કરવી તેના વિશે પણ માહિતગાર કરવામાં આવ્યા હતા.

આ અંગે સ્કૂલના ડિરેક્ટર અને પ્રિન્સિપલ શ્રી કે. મેક્સવેલ મનોહરએ જણાવ્યું કે,
“અમારા વિદ્યાર્થીઓની સુરક્ષા અમારી પ્રથમ પ્રાથમિકતા છે. આવા જાગૃતિ સત્રો બાળકોમાં મહત્વપૂર્ણ જીવન કૌશલ્યો વિકસાવવામાં મદદ કરે છે. અમે માતા-પિતાને પણ આ પ્રયાસોમાં જોડીને એક એવું સુરક્ષિત વાતાવરણ ઊભું કરવા માગીએ છીએ, જ્યાં બાળક સ્કૂલ અને ઘરે બંને જગ્યાએ પોતાને સુરક્ષિત અનુભવે.”