સુરત: શહેરમાં સતત વરસાદ બાદ મીઠી અને સીમાડા ખાડીના વિસ્તારોમાં આજે પણ જળબંબાકારની સ્થિતિ યથાવત રહી છે. ખાડીની સપાટી હજુ પણ ઊંચી હોવાથી આસપાસના નીચાણવાળા વિસ્તારોમાં પાણી ભરાયેલા જોવા મળ્યા હતા. અનેક રહેણાંક વિસ્તારો અને રસ્તાઓ પર પાણી ભરાતા સ્થાનિકોને અવરજવરમાં ભારે મુશ્કેલીનો સામનો કરવો પડી રહ્યો છે.
મીઠી ખાડીની ભયજનક સપાટી 9.35 ની સામે હાલ સપાટીનું સ્થળ 8.30 નોંધાયું છે. આ સિવાય મીઠી ખાડી અને આસપાસના નીચાણવાળા વિસ્તારમાં તો ગઈકાલથી જ જળબંબાકાર ની સ્થિતિ સર્જવા પામી હતી. ખાડી કિનારાના વિસ્તારમાં ચારથી પાંચ ફૂટ પાણી ભરાતા તંત્ર પણ અલગ મોડમાં આવી ગયું છે . આ સિવાય સીમાડા ખાડીની પણ સપાટીમાં પણ નોંધપાત્ર વધારો જોવા મળી રહ્યું છે. હાલમાં સીમાડા ખાડી ભયજનક સપાટી 4. 50 મીટરની સામે ચાર મીટર પર વહેતી જોવા મળી રહી છે. જેને કારણે તંત્ર દ્વારા સ્થિતિને પહોંચી વળવા માટે હરકતમાં આવી ગયું છે.
સ્થાનિકોના જણાવ્યા મુજબ છેલ્લા કેટલાક દિવસોથી પાણીનો નિકાલ ધીમો હોવાથી ઘરો અને દુકાનોની આસપાસ પાણી યથાવત છે. કેટલાક વિસ્તારોમાં ગંદા પાણીના ભરાવાને કારણે દુર્ગંધ ફેલાઈ રહી છે, જ્યારે મચ્છરોના ઉપદ્રવથી લોકોમાં આરોગ્ય અંગે પણ ચિંતા વધી છે.
રહેવાસીઓએ તંત્ર પાસે પાણીના ઝડપી નિકાલ, સફાઈ કામગીરી અને અસરગ્રસ્ત વિસ્તારોમાં જરૂરી સુવિધાઓ ઉપલબ્ધ કરાવવા માંગ કરી છે. બીજી તરફ મહાનગરપાલિકા દ્વારા પંપિંગ મશીનો અને સફાઈ ટીમોને મેદાને ઉતારી પાણી ઉતારવાની કામગીરી હાથ ધરાઈ હોવાનું જણાવાયું છે.
હવામાન વિભાગે આગામી દિવસોમાં પણ વરસાદની શક્યતા વ્યક્ત કરતા નાગરિકોને સાવચેત રહેવા અને જરૂરી ન હોય ત્યાં સુધી પાણી ભરાયેલા વિસ્તારોમાં અવરજવર ટાળવા અપીલ કરવામાં આવી છે.
