નરથાણની ધ રેડિયન્ટ વર્લ્ડ સ્કૂલમાં ગોજુ રિયો ઓકિનાવનકાન સ્ટેટ કરાટે ચેમ્પિયનશિપ-2026 યોજાઈ: 5 જિલ્લાના 160થી વધુ ખેલાડીઓ વચ્ચે જોરદાર મુકાબલા
જાપાનના સેન્સેઇ જુન્યા તાકાહાંસીની વિશેષ ઉપસ્થિતિમાં સ્પર્ધાનો પ્રારંભ, વિજેતાઓને મેડલ અને પ્રમાણપત્ર આપી સન્માનિત કરાયા
સુરત: નરથાણ સ્થિત ધ રેડિયન્ટ વર્લ્ડ સ્કૂલ ખાતે ગોજુ રિયો ઓકિનાવનકાન સ્ટેટ કરાટે ચેમ્પિયનશિપ-2026નું ભવ્ય આયોજન કરવામાં આવ્યું હતું. રાજ્ય કક્ષાની આ પ્રતિષ્ઠિત સ્પર્ધામાં સુરત, અમદાવાદ, નવસારી, ભરૂચ અને બારડોલી સહિત પાંચ જિલ્લાના વિવિધ શાળાઓના 160થી વધુ વિદ્યાર્થી-વિદ્યાર્થીનીઓએ ઉત્સાહપૂર્વક ભાગ લઈને પોતાની કરાટે કૌશલ્યનું પ્રદર્શન કર્યું હતું.
સ્પર્ધામાં મુખ્ય અતિથિ તરીકે જાપાનથી આવેલા સેન્સેઇ જુન્યા તાકાહાંસી ઉપસ્થિત રહ્યા હતા. તેઓ કરાટે ક્ષેત્રે સેકન્ડ ડેન બ્લેક બેલ્ટ ધરાવતા અનુભવી કોચ તેમજ શોતોકાન કરાટેના ભૂતપૂર્વ ચેમ્પિયન ખેલાડી છે. તેમણે પોતાના પ્રેરણાદાયી સંબોધનમાં ખેલાડીઓને રમતગમતની ભાવના, શિસ્ત અને સમર્પણનું મહત્વ સમજાવ્યું હતું. ત્યારબાદ તેમના હસ્તે ચેમ્પિયનશિપનું ઔપચારિક ઉદ્ઘાટન કરવામાં આવ્યું હતું.
સ્પર્ધામાં અંડર-6, અંડર-8, અંડર-10, અંડર-12, અંડર-14, અંડર-17 અને અંડર-19 વયજૂથમાં વિવિધ કેટેગરીની સ્પર્ધાઓ યોજાઈ હતી. વિજેતા ખેલાડીઓને મહાનુભાવોના હસ્તે મેડલ અને પ્રમાણપત્રો અર્પણ કરીને સન્માનિત કરવામાં આવ્યા હતા.
ધ રેડિયન્ટ વર્લ્ડ સ્કૂલની મેડલ ટેલી
અંડર-8 (20 કિગ્રા): 1 ગોલ્ડ, 1 સિલ્વર, 3 બ્રોન્ઝ
અંડર-8 (25 કિગ્રા): 1 ગોલ્ડ, 1 બ્રોન્ઝ
અંડર-8 (30 કિગ્રા): 2 ગોલ્ડ, 1 સિલ્વર, 2 બ્રોન્ઝ
અંડર-12 (25 કિગ્રા): 1 સિલ્વર, 1 બ્રોન્ઝ
અંડર-12 (30 કિગ્રા): 1 સિલ્વર, 1 બ્રોન્ઝ
અંડર-12 (35 કિગ્રા): 1 ગોલ્ડ, 1 બ્રોન્ઝ
અંડર-12 (+35 કિગ્રા): 1 ગોલ્ડ
અંડર-14 (50 કિગ્રા): 1 સિલ્વર
અંડર-17 (બોયઝ): 1 ગોલ્ડ
સ્પર્ધાના અંતે ધ રેડિયન્ટ વર્લ્ડ સ્કૂલના સંચાલક કિશનભાઈ માંગુકિયા તેમજ કરાટે એસોસિએશનના હોદ્દેદારોએ તમામ સહભાગી શાળાઓ, કોચ અને વિજેતા ખેલાડીઓને અભિનંદન પાઠવી તેમના ઉજ્જવળ ભવિષ્ય માટે શુભેચ્છાઓ વ્યક્ત કરી હતી.
