ગ્રામીણ ભારતના ઉજ્જવળ ભવિષ્ય માટે અદાણી ફાઉન્ડેશન અને અદાણી દહાણુ થર્મલ પાવર સ્ટેશન (ADTPS) દ્વારા ઉમદા પહેલ કરવામાં આવી છે. આગવન-શિશુપાડા સ્થિત જિલ્લા પરિષદ શાળાના મર્યાદિત અને જર્જરિત માળખાનો કાયાકલ્પ થયો છે. અદાણી સમૂહ દ્વારા બાળકો માટે તમામ સુવિધાઓથી સજ્જ નવનિર્મિત અને ભવ્ય શાળા ભવન અર્પણ કરવામાં આવ્યું છે, જેનું લોકાર્પણ એક યાદગાર સમારોહમાં હર્ષોલ્લાસ સાથે કરવામાં આવ્યું હતું.
અત્યાર સુધી આ શાળામાં સુવિધાઓનો એટલો અભાવ હતો કે એક જ વર્ગખંડમાં બે અલગ-અલગ ધોરણના વિદ્યાર્થીઓને બેસાડવા પડતા હતા. અગાઉ આ સમસ્યાને દૂર કરવા માટે અદાણી સમૂહને રજૂઆત કરવામાં આવી હતી. ADTPS ની CSR ટીમે તે સંદર્ભે ત્વરિત પગલાં લીધાં અને અદાણી ફાઉન્ડેશનના સહયોગથી બે અદ્યતન ક્લાસરૂમ અને એક વિશાળ મલ્ટીપર્પઝ હોલનું નિર્માણ કર્યું. હવે બાળકો મુક્ત વાતાવરણમાં ગુણવત્તાયુક્ત શિક્ષણ મેળવી શકશે. ગ્રામ્ય વિસ્તારના વિદ્યાર્થીઓ પણ શહેરી બાળકોની જેમ ભણી ઉજ્વળ કારકિર્દી બનાવી શકશે.
આ પ્રસંગે આયોજીત કાર્યક્રમમાં ADTPS ના ચીફ બિઝનેસ ઓફિસરના હસ્તે શાળાનું નવું મકાન શાળા વ્યવસ્થાપન સમિતિને અર્પણ કરવામાં આવ્યું હતું. નવા ક્લાસરૂમ જોઈને વિદ્યાર્થીઓના ચહેરા પર છવાયેલી સ્મિત અને શિક્ષકોનો ઉત્સાહ આ પ્રોજેક્ટની સફળતાની સાક્ષી પૂરતો હતો. બાળકોએ મંચ પર આવીને અદાણી ફાઉન્ડેશનનો હૃદયપૂર્વક આભાર માન્યો હતો.
આગવન-શિશુપાડા ખાતે નવનિર્મિત ભવનમાં માત્ર સિમેન્ટની દીવાલો નથી, પણ બાળકો માટે હરખાવા જેવી અનેક બાબતો છે. બે વિશાળ, હવા-ઉજાસવાળા ક્લાસરૂમ અને એક મોટો મલ્ટિપર્પઝ હોલ, જ્યાં બાળકો પોતાની કળા અને સંસ્કૃતિને પણ ખીલવી શકશે. ગુણવત્તાના ઉચ્ચ ધોરણો સાથે બનેલી આ ઇમારત હવે આ વિસ્તારમાં શિક્ષણનું નવું સરનામું બની છે.
અદાણી ફાઉન્ડેશન અને ADTPS ની આ પહેલે સાબિત કરી દીધું છે કે જ્યારે કોર્પોરેટ જગત અને ગ્રામીણ સમુદાય હાથ મિલાવે છે, ત્યારે પરિવર્તન ચોક્કસ આવે છે. અગવાન-શિશુપાડાની આ શાળા હવે માત્ર અક્ષરજ્ઞાનનું કેન્દ્ર નથી, પણ સેંકડો બાળકોના સપનાઓને પાંખો આપનારું આકાશ બની ગઈ છે.
