સુરત: જિલ્લા કલેક્ટર તેજસ પરમારના અધ્યક્ષસ્થાને કલેક્ટર કચેરીના સભાખંડમાં સુરત જિલ્લા રોડ સેફ્ટી કાઉન્સિલની બેઠક મળી હતી. બેઠકમાં જિલ્લામાં માર્ગ સલામતી વ્યવસ્થાને સુદ્રઢ બનાવવા અને અકસ્માતોનું પ્રમાણ ઘટાડવા માટેના મહત્વના મુદ્દાઓની ચર્ચા કરવામાં આવી હતી.
જિલ્લા કલેક્ટરએ સુરત જિલ્લામાં ખાસ કરીને હાઈવે પર થતાં માર્ગ અકસ્માતોનું એનાલીસીસ કરી યોગ્ય પગલાં દ્વારા તેને નિયંત્રિત કરવા અંગે સંબંધિત વિભાગોને સૂચના આપી હતી. તેમણે આરોગ્ય વિભાગને માર્ગ અકસ્માતનો માસિક રીપોર્ટ તૈયાર કરી અકસ્માતનો સમય અને તે સ્થળ પર પહોંચતી ૧૦૮ ઈમરજન્સી સેવાનો રિસ્પોન્સ રેટ શોધવા સૂચન કર્યું હતું. જેથી અકસ્માતોના હોટ સ્પોટ ઓળખી જરૂરીયાતને આધારે ૧૦૮ ઈમરજન્સી સેવાઓ ગોઠવી શકાય.
વધુમાં કલેકટરએ શહેર અને જિલ્લાને જોડતા વરાછા સ્થિત એન્થમ સર્કલ પર થતી ભારે ટ્રાફિક સમસ્યા અંગે જાણકારી મેળવી હતી. અને નિવારણના પગલારૂપે તે સ્થળે ટેકનીકલ કમિટીના અભિપ્રાય મેળવી તેના ઉપર ચર્ચા કરી સમાધાન અંગે માર્ગદર્શન આપ્યું હતું. તેમજ તેમણે દરેક વિભાગોને નિયમિત રીતે માસિક કામગીરીનો અહેવાલ બનાવી કામ પહેલા અને પછીનું ફોટા સહિતનું દસ્તાવેજીકરણ કરવા સૂચના આપી હતી.
અધ્યક્ષએ પોલીસ અને આર.ટી.ઓ. તંત્ર દ્વારા કરાતી રોડ સાઈડ ડ્રાઈવિંગ અને વાહનો દ્વારા થતા ઓવર સ્પીડીંગ પર નિયંત્રણ, જિલ્લાના તમામ રસ્તાઓમાં માર્ગ સલામતી માટે રોડ સમારકામ, સાઈન બોર્ડસ, ઝીબ્રા ક્રોસિંગ, સ્પીડ બ્રેકરની કામગીરીની સમીક્ષા કરી હતી. આ બેઠકમાં કાઉન્સિલના સભ્યો અને અધ્યક્ષ દ્વારા માર્ગ સલામતીને લગતા અન્ય સૂચનો પણ રજૂ કરવામાં આવ્યા હતા.
બેઠકમાં જિલ્લા પોલીસ અધિક્ષક રાજેશ ગઢિયા, RTOશ્રી સી.ડી.પટેલ, ARTO એન કે સોલંકી, NHAI, માર્ગ અને મકાન વિભાગ(R&B), આરોગ્ય, શિક્ષણ, સુડા સહિતના વિભાગીય અધિકારીઓ ઉપસ્થિત રહ્યા હતા.
