શ્રી કરણી માતા મંદિર સુરતધામમાં 18 ઓક્ટોબરે 639મો પાવન અવતાર દિવસ ઉજવાશે

સુરત: શ્રી કરણી માતા મંદિર સુરતધામ ખાતે રાજરાજેશ્વરી જગદંબા માં કરણીજી મહારાજનો 639મો પાવન અવતાર દિવસ આગામી રવિવાર, 18 ઓક્ટોબર 2026ના રોજ શ્રદ્ધા, ભક્તિ અને હર્ષોલ્લાસ સાથે ઉજવવામાં આવશે. આ પાવન પ્રસંગે મંદિર પરિસરમાં વિવિધ ધાર્મિક કાર્યક્રમોનું આયોજન કરવામાં આવ્યું છે. મંદિર પરિવાર દ્વારા તમામ શ્રદ્ધાળુઓને પરિવાર સહિત ઉપસ્થિત રહી માં કરણીનાં દર્શન કરવા, પૂજા-અર્ચનામાં સહભાગી બનવા અને માતાજીના આશીર્વાદ પ્રાપ્ત કરવા ભાવભર્યું આમંત્રણ આપવામાં આવ્યું છે.

આયોજન અંતર્ગત રવિવારે સાંજે 7:15 કલાકે મહાઆરતી, રાત્રે 8:15 કલાકે મહાપ્રસાદી તથા રાત્રે 9:15 કલાકથી માતાજીની ભવ્ય ચિરજાનો કાર્યક્રમ યોજાશે. આ ધાર્મિક મહોત્સવમાં મોટી સંખ્યામાં શ્રદ્ધાળુઓ ઉપસ્થિત રહેવાની સંભાવના છે. કાર્યક્રમમાં સુરતના જિલ્લા કલેક્ટર તેજસ પરમાર, પોલીસ કમિશનર બાબાંગ જમીર, મહાનગરપાલિકાના કમિશનર રાજકુમાર બેનીવાલ, અધિક પોલીસ કમિશનર બલરામ મીણા, મહેન્દ્ર બગડિયા અને કરણરાજસિંહ વાઘેલા સહિતના વરિષ્ઠ અધિકારીઓ તથા મહાનુભાવોને આમંત્રણ આપવામાં આવ્યું છે.

ધાર્મિક કાર્યક્રમ દરમિયાન ગણપત દાન સાંગાડ, વિષ્ણુજી જોશી એન્ડ પાર્ટી, શ્રવણજી ધામુ તથા શ્રી કરણી ભક્ત મંડળ સુરત દ્વારા માતાજીની ચિરજાની પ્રસ્તુતિ કરવામાં આવશે. આ ઉપરાંત શ્રી કરણી માતા ભક્ત મંડળ સચિન દ્વારા ગાજતે-વાજતે અને પુષ્પવર્ષા સાથે ત્રીજી પદયાત્રા કાઢવામાં આવશે. જ્યારે શ્રી કરણી માતા સંઘ પાંડેસરા તથા શ્રી કરણી માતા સુખી સંઘ વડોદ ગામ દ્વારા ચોથી પદયાત્રા ડુમસ સ્થિત કરણી માતા મંદિર ખાતે પહોંચશે. આ પદયાત્રાઓમાં મોટી સંખ્યામાં માતાજીના ભક્તો જોડાશે.

આ સમગ્ર કાર્યક્રમનું આયોજન શ્રી કરણી માતા મંદિર, રામાયણ ફાર્મ હાઉસ, સી.બી. પટેલ ગ્રાઉન્ડ, એરપોર્ટની સામે, ડુમસ રોડ, સુરત ખાતે કરવામાં આવ્યું છે. આ અંગે યોજાયેલી પત્રકાર પરિષદમાં માં કરણીના ભક્તો બજંરસિંહ કવિયા, સંતોષ નાહર, ભવાનીસિંહ કવિયા, શક્તિસિંહ તંવર અને લલિત શર્મા સહિતના આગેવાનો ઉપસ્થિત રહ્યા હતા. મંદિર પરિવાર દ્વારા તમામ ધર્મપ્રેમી જનતાને આ પાવન અવસરે ઉપસ્થિત રહી માતાજીના આશીર્વાદ પ્રાપ્ત કરવા અપીલ કરવામાં આવી છે.