રિતિકા જતીન આહુજાની ઉદ્યોગસાહસિક સફરથી સુરતની મહિલા ઉદ્યોગસાહસિકોને મળી પ્રેરણા

સુરત, 15 ઑક્ટોબર, 2026: મહિલાઓને ઉદ્યોગસાહસિકતા તરફ પ્રેરિત કરવા અને તેમના વ્યવસાયિક વિકાસને પ્રોત્સાહન આપવાના હેતુથી નવજીવન લક્ઝરી કાર્સ દ્વારા સુરતમાં એક વિશેષ સંવાદ કાર્યક્રમનું આયોજન કરવામાં આવ્યું હતું. આ કાર્યક્રમમાં ક્વીન્સ ડ્રાઇવ ક્લબનાં સ્થાપક રિતિકા જતીન આહુજાની ઉદ્યોગસાહસિક સફર, તેમના અનુભવો અને લક્ઝરી ઓટોમોબાઇલ ક્ષેત્રમાં તેમણે સ્થાપિત કરેલી આગવી ઓળખ અંગે ચર્ચા કરવામાં આવી હતી.

નવજીવન લક્ઝરી કાર્સના મેનેજિંગ ડિરેક્ટર યશ ગજ્જર અને વાઇસ પ્રેસિડેન્ટ, માર્કેટિંગ અને પીઆર દિશા ગજ્જરની સંકલ્પના અને આયોજન હેઠળ યોજાયેલા આ કાર્યક્રમનો મુખ્ય હેતુ સુરતની મહિલા ઉદ્યોગસાહસિકોને પ્રેરણા આપવાનો તથા તેમને વ્યવસાયિક વિકાસ, નેતૃત્વ અને આત્મવિશ્વાસ માટે નવી દિશા આપવાનો હતો.

દિશા ગજ્જરે જણાવ્યું હતું કે, “આજે મહિલાઓ વિવિધ ક્ષેત્રોમાં પોતાની ક્ષમતા સાબિત કરી રહી છે. આવા સમયમાં તેમના વિકાસ અને સશક્તિકરણને પ્રોત્સાહન આપતાં મંચ ઊભા કરવા જરૂરી છે. જ્ઞાનવર્ધક અને સંવાદાત્મક કાર્યક્રમો દ્વારા અમે સુરતના મહિલા ઉદ્યોગસાહસિકોને શીખવાની, નવા વિચારો મેળવવાની અને પોતાની વ્યવસાયિક સફરને વધુ મજબૂત બનાવવાની તક આપવા માગીએ છીએ.”

રિતિકા આહુજા છેલ્લા 12 વર્ષથી વધુ સમયથી પોતાના પતિ સાથે બિગ બોય ટોય્ઝના લક્ઝરી ઓટોમોબાઇલ વ્યવસાય સાથે સંકળાયેલાં છે. આ ક્ષેત્રમાં પોતાની વ્યાવસાયિક ઓળખ ઊભી કરવાની સાથે તેમણે ક્વીન્સ ડ્રાઇવ ક્લબની સ્થાપના કરી છે. આ ક્લબ સુપરકાર પ્રત્યે ઉત્સાહ ધરાવતી મહિલાઓને એક મંચ પર લાવે છે. છેલ્લા છ વર્ષ દરમિયાન ક્લબ દ્વારા મહિલાઓ માટે અનેક સુપરકાર ડ્રાઇવનું આયોજન કરવામાં આવ્યું છે, જેનો ઉદ્દેશ મહિલાઓને હાઇ-પરફોર્મન્સ કારની દુનિયા સાથે જોડવાનો અને પરંપરાગત માન્યતાઓથી આગળ વધવા પ્રોત્સાહિત કરવાનો છે.

કાર્યક્રમ દરમિયાન રિતિકાની સફર, ક્વીન્સ ડ્રાઇવ ક્લબની સ્થાપના પાછળની પ્રેરણા તેમજ વ્યવસાયમાં આત્મવિશ્વાસ, દૃઢ નિશ્ચય અને સ્વતંત્ર ઓળખનું મહત્ત્વ ચર્ચાના કેન્દ્રમાં રહ્યાં હતાં.

મહિલાઓ માટે કાર્ય કરવાની નવજીવન લક્ઝરી કાર્સની આ પહેલ તેના વ્યાપક સામાજિક અભિગમને પણ દર્શાવે છે. કંપનીની ટીમ લેન્ડ રોવર સુરત માટે વિવિધ કાર્યક્રમોનું આયોજન કરવાની સાથે ‘ગુંજ (Goonjj)’ નામના મહિલા સહયોગી સમુદાયનું પણ સંચાલન કરે છે*, જે ખાસ કરીને મહિલાઓ સંબંધિત સામાજિક હેતુઓ માટે કાર્યરત છે.

આવા પ્રયાસો દ્વારા નવજીવન લક્ઝરી કાર્સનો ઉદ્દેશ મહિલાઓને એકબીજાના અનુભવોમાંથી શીખવાની, નવા સંબંધો વિકસાવવાની અને પોતાની વ્યવસાયિક તથા સામાજિક સફરને વધુ મજબૂત બનાવવાની તકો પૂરી પાડવાનો છે.