જીવન ભારતી શાળામાં ૩૨મી જિલ્લા કક્ષાની ‘રાષ્ટ્રીય બાળ વિજ્ઞાન પરિષદ’ યોજાઈ

સુરત:  કેન્દ્ર સરકાર તથા ગુજરાત સરકારના વિજ્ઞાન અને ટેકનોલોજી વિભાગ અંતર્ગત કાર્યરત ગુજકોસ્ટ, ગાંધીનગર પ્રેરિત ‘જિલ્લા લોક વિજ્ઞાન કેન્દ્ર,તાપી-સુરત શહેર’ના સંયુક્ત ઉપક્રમે નાનપુરા સ્થિત જીવનભારતી શાળા ખાતે જિલ્લા કલેકટર તેજસ પરમારની ઉપસ્થિતિમાં જિલ્લા કક્ષાની ૩૨મી ‘રાષ્ટ્રીય બાળ વિજ્ઞાન પરિષદ-૨૦૨૬’ યોજાઈ હતી.

આ અવસરે જિલ્લા કલેક્ટરશ્રીએ બાળ વૈજ્ઞાનિકોને પ્રોત્સાહિત કરતા જણાવ્યું હતું કે, વિજ્ઞાન અને ટેક્નોલોજી ક્ષેત્રે વિદ્યાર્થીઓની ઉત્સુકતા તથા જિજ્ઞાસાવૃત્તિ જ તેમને ભવિષ્યના સફળ સંશોધક બનાવે છે. તેમણે વિદ્યાર્થીઓને તેમની જિજ્ઞાસાવૃત્તિ સદાય જીવંત રાખવા અપીલ કરી હતી. શિક્ષકોના માર્ગદર્શન હેઠળ ઊંડી સમજ કેળવી દેશ અને સમાજના વિકાસમાં યોગદાન આપવા અનુરોધ કર્યો હતો.

આ વર્ષે નેશનલ ચિલ્ડ્રન સાયન્સ કોંગ્રેસ અંતર્ગત યોજાઈ રહેલ બાળ વિજ્ઞાન પરિષદમાં સુરત શહેર અને સુરત તથા તાપી જિલ્લાના ૧૬ તાલુકાઓની શ્રેષ્ઠ શાળાઓમાંથી પસંદગી પામેલા બાળ વૈજ્ઞાનિકોએ ૧૦૦ જેટલા સાયન્સ પ્રોજેક્ટ રજૂ કર્યા હતા. આ બાળ વૈજ્ઞાનિકો દ્વારા ‘સુસ્થાયી ભવિષ્ય માટે વિજ્ઞાન અને પ્રૌદ્યોગિકી’ મુખ્ય વિષય પર આધારિત વિવિધ પેટા થીમ હેઠળ પોતાના સંશોધનાત્મક પ્રોજેક્ટ્સ, વૈજ્ઞાનિક કૃતિઓ તૈયાર કરવામાં આવી છે,

બાળ વિજ્ઞાનિકોની કૃતિઓની દરેક થીમમાંથી શ્રેષ્ઠ બે પ્રોજેક્ટ્સને એવોર્ડ વિજેતા જાહેર કરાશે. પસંદગી પામેલા આ વિજેતા બાળ વૈજ્ઞાનિકોને રાજ્ય કક્ષાની સ્પર્ધા માટે ગુજકોસ્ટ, ગાંધીનગર દ્વારા લઈ જવામાં આવશે, જ્યાં તેઓ સુરત અને તાપી જિલ્લાનું પ્રતિનિધિત્વ કરશે.

આ પ્રસંગે સુરત અને તાપી જિલ્લા લોક વિજ્ઞાન કેન્દ્રના ડિરેકટર કેતન શાહ, રાષ્ટ્રીય બાળ વિજ્ઞાન પરિષદના જિલ્લા કોર્ડીનેટર ભૂમિલ શાહ, જીવનભારતી મંડળના મંત્રી અજીત શાહ અને મયંક ત્રિવેદી, તાજપોર એન્જિનિયરિંગ કોલેજના નિર્ણાયકો સહિત વિવિધ શાળાના શિક્ષકો, વિજ્ઞાન પ્રેમીઓ, બાળ વૈજ્ઞાનિકો જોડાયા હતા.