નવી સિવિલ હોસ્પિટલ ખાતે હાડકાની (ઓર્થોપેડીક) ઓ.પી.ડી. કિડની બિલ્ડિંગ ખાતે કાર્યરત કરાઈ: દર્દીઓને મળશે અદ્યતન અને એક જ છત નીચે તમામ સુવિધાઓ

સુરત: નવી સિવિલ હોસ્પિટલ-સુરતમાં આવતા દર્દીઓની સુવિધા માટે અગાઉ જૂની બિલ્ડિંગમાં કાર્યરત હાડકાની (ઓર્થોપેડીક) ઓ.પી.ડી.ને હવે કિડની બિલ્ડિંગમાં સ્થળાંતરિત કરવામાં આવી છે, જે આવતીકાલ સોમવારથી પૂર્ણ કક્ષાએ કાર્યરત થશે.

ઉલ્લેખનીય છે કે, આરોગ્ય રાજ્યમંત્રી પ્રફુલભાઈ પાનશેરીયાએ તાજેતરમાં નવી સિવિલ હોસ્પિટલની લીધેલી આકસ્મિક મુલાકાત દરમિયાન હાડકાના દર્દીઓને જૂની બિલ્ડિંગમાંથી એક્સ-રે કે અન્ય તપાસ માટે એક બિલ્ડિંગથી બીજી બિલ્ડિંગમાં જવા પડતી હાલાકી અને વ્હીલચેર કે સ્ટ્રેચર વગર ચાલવામાં પડતી મુશ્કેલીઓ મંત્રીના ધ્યાન પર આવી હતી. જેને ધ્યાને લઈને ત્વરિત ધોરણે આ સુવિધાજનક ફેરફાર કરવામાં આવ્યો છે.

ઓપીડી હવે કિડની બિલ્ડિંગમાં શિફ્ટ થવાથી દર્દીઓએ હવે એક્સ-રે, સોનોગ્રાફી, સીટી સ્કાન કે લોહીની તપાસ (બ્લડ રિપોર્ટ) માટે દૂર સુધી જવું નહીં પડે. આ તમામ સુવિધાઓ નજીકમાં જ ઉપલબ્ધ થશે. ઓ.પી.ડી.ની બાજુમાં જ ડિજિટલ એક્સ-રે મશીન અને પ્લાસ્ટર સહિતની તમામ સુવિધાઓ એક જ સ્થળે મળી રહેશે. કિડની બિલ્ડિંગ ખાતે રેમ્પની સુવિધા હોવાથી વ્હીલચેર અને સ્ટ્રેચર સરળતાથી લઈ જઈ શકાશે. અહીં સ્થળ પર જ વ્હીલચેર અને સ્ટ્રેચર સજ્જ રાખવામાં આવશે જેથી દર્દીએ શોધવા માટે ભટકવું નહીં પડે.

બાજુમાં જ ટ્રોમા સેન્ટર હોવાથી ઈમરજન્સીમાંથી દર્દીઓને ત્વરિત ઓ.પી.ડી.માં લાવી શકાશે અને ઓ.પી.ડી.માં જો કોઈ દર્દી ગંભીર બને તો એ જ ફ્લોર પર આવેલા ટ્રોમા સેન્ટરમાં ત્વરિત સારવાર આપી શકાશે. તેમજ બાજુમાં જ મેડિસીન ઓ.પી.ડી., ઇસીજી (ECG) વિભાગ અને ઇકો કાર્ડિયોગ્રામ (Echo) ની સુવિધાઓ પણ ઉપલબ્ધ કરાઈ છે.

દિવ્યાંગ પ્રમાણપત્ર તેમજ અન્ય જરૂરી તપાસ માટે એક જ ફ્લોર પર વ્યવસ્થા હોવાથી દિવ્યાંગજનોને પણ ધક્કા ખાવામાંથી મુક્તિ મળશે. કેમ્પસમાં આવવા-જવા માટે ઇ-વેહિકલની સુવિધા ઉપલબ્ધ રહેશે. આ ઉપરાંત, દર્દીઓ અને તબીબો માટે યોગ્ય બેઠક વ્યવસ્થા પણ સુનિશ્ચિત કરવામાં આવી છે.

સોમવારથી કિડની બિલ્ડિંગ ખાતે કાર્યરત થનારી આ નવીન અને અત્યાધુનિક હાડકાની ઓ.પી.ડી.થી સુરત તેમજ દક્ષિણ ગુજરાતના દર્દીઓનો સમય બચશે અને તેમને ખૂબ જ રાહત અનુભવાશે, તેમ નવી સિવિલ હોસ્પિટલના તબીબી અધિક્ષક ડૉ. પારુલ વડગામાની યાદીમાં જણાવાયું છે.