ડુમ્મસ ખાતે 9 મેની સાંજે સુફી નાઈટ સાથે ચેરિટી કાર્યક્રમનું આયોજન

સુરત: ડુમ્મસ વિસ્તારમાં આવેલ એસી ડોમ ખાતે 9 મેની સાંજે એક વિશેષ સુફી નાઈટ અને ચેરિટી કાર્યક્રમનું આયોજન કરવામાં આવ્યું છે. આ કાર્યક્રમ કોફી કલ્ચર ડુમ્મસ અને અનંતમ ઇવેન્ટ્સ દ્વારા પ્રજ્ઞાચક્ષુ ફાઉન્ડેશન તથા નબી કી દુનિયા ફાઉન્ડેશનના સહયોગથી યોજાઈ રહ્યો છે.

આ અંગે મીત મિહિર દેસાઈએ માહિતી આપતા જણાવ્યું કે કાર્યક્રમનો મુખ્ય હેતુ ખાસ કરીને દિવ્યાંગ, અંધ વિદ્યાર્થીઓને શિક્ષણ માટે આર્થિક સહાય પૂરી પાડવાનો છે. આ કાર્યક્રમમાં જાણીતા સુફી ગાયક ભાવિન શાસ્ત્રી અને પોઇટ્રી આર્ટિસ્ટ અઝહર ઈકબાલ પોતાની કલાત્મક રજૂઆત કરશે. કાર્યક્રમ દરમિયાન પ્રેક્ષકો અને સ્પોન્સર્સ તરફથી એકત્રિત થનાર ફંડનું ઓન-સ્ટેજ ડોનેશન કરવામાં આવશે.

આયોજકોના જણાવ્યા મુજબ, અનેક અંધ વિદ્યાર્થીઓ આર્થિક સંકટના કારણે શિક્ષણથી વંચિત રહે છે. પ્રજ્ઞાચક્ષુ ફાઉન્ડેશન આવા વિદ્યાર્થીઓને સહાય કરવા માટે કાર્યરત છે અને આ કાર્યક્રમ દ્વારા આશરે 8 થી 10 લાખ રૂપિયા એકત્રિત કરવાનો લક્ષ્ય રાખવામાં આવ્યો છે, જે ધોરણ 1 થી 12 સુધીના વિદ્યાર્થીઓના શિક્ષણમાં ઉપયોગી બનશે.

કોફી કલ્ચર ડુમ્મસ દ્વારા અગાઉ પણ નાના પાયે ચેરિટી કાર્યક્રમો યોજાઈ ચૂક્યા છે. દિવાળી દરમ્યાન પણ વિદ્યાર્થીઓને સહાય માટે કાર્યક્રમ યોજાયો હતો, જેમાં દાતાઓનો સારો પ્રતિસાદ મળ્યો હતો.

આયોજકો દ્વારા શહેરના નાગરિકોને આ કાર્યક્રમમાં જોડાઈને ચેરિટી માટે સહભાગી થવા અને દાતાશ્રી તરીકે યોગદાન આપવા અપીલ કરવામાં આવી છે, જેથી વધુમાં વધુ જરૂરિયાતમંદ વિદ્યાર્થીઓને શિક્ષણમાં સહાય મળી શકે.