સુરત : નિકેતન સ્કૂલ દ્વારા તાજેતરમાં “નિકેતન નોસ્ટાલ્જીયા – 90’s કે સિતારે” કાર્યક્રમનું શાનદાર આયોજન કરવામાં આવ્યું હતું, જેમાં ધોરણ 5 થી 8 ના વિદ્યાર્થીઓ અને શિક્ષકોએ મળીને 90ના દાયકાની સુવર્ણ યાદોને જીવંત કરી હતી. આ પ્રસંગે મુખ્ય અતિથિ તરીકે પ્રતિક્ષા દીપક પાટીલ, મહિમા સંદીપ પાટીલ અને હર્ષા રવીન્દ્રભાઈ પાટીલ ઉપસ્થિત રહ્યા હતા.
કાર્યક્રમનું વિશેષ આકર્ષણ એ રહ્યું કે, આ ત્રણેય દીકરીઓએ CA (ચાર્ટર્ડ એકાઉન્ટન્ટ) ની પરીક્ષા પ્રથમ પ્રયત્ને (First Attempt) પાસ કરીને પરિવાર અને સમાજનું નામ રોશન કર્યું છે, જે બદલ નિકેતન સ્કૂલ વતી ત્રણેય દીકરીઓનું ભવ્ય સન્માન કરવામાં આવ્યું હતું. આ પ્રસંગે પત્રકાર દીપક પાટીલ અને પત્રકાર સંદીપ પાટીલ પણ ખાસ હાજર રહ્યા હતા.
કાર્યક્રમ દરમિયાન વિદ્યાર્થીઓએ ’90s સુપરસ્ટાર ડાયલોગ ચેલેન્જ’, ‘ડાન્સ કોમ્પિટિશન’ અને ‘મ્યુઝિકલ અંતાક્ષરી’ જેવી વિવિધ સ્પર્ધાઓમાં ઉત્સાહભેર ભાગ લીધો હતો. આ સાથે જ ’90s ફેશન રેમ્પ વોક’ માં બાળકોએ તે સમયના યુગને રેમ્પ પર સાકાર કર્યો હતો.
સન્માનિત થયેલી દીકરીઓની સફળતાથી પ્રેરિત થઈને સ્કૂલના ટ્રસ્ટીઓ અને શિક્ષકોએ બાળકોને શિક્ષણમાં ઉચ્ચ શિખરો સર કરવા પ્રોત્સાહિત કર્યા હતા. “સ્ટુડન્ટ્સ એન્ડ ફેકલ્ટી યુનાઈટ” ની થીમ પર આધારિત આ કાર્યક્રમ સાંસ્કૃતિક વારસા અને શૈક્ષણિક સિદ્ધિઓના સંગમ સમાન બની રહ્યો હતો.
