નવસારીના વાંસીબોરસી ખાતે ૧૧૪૧ એકરમાં પી.એમ. મિત્ર પાર્કના નિર્માણ માટે રાજ્ય અને કેન્દ્ર સરકાર વચ્ચે એમ.ઓ.યુ.

સુરત: વડાપ્રધાન નરેન્દ્ર મોદીના ડ્રીમ પ્રોજેક્ટ ‘પી.એમ. મિત્ર (મેગા ઈન્ટીગ્રેટેડ ટેક્ષ્ટાઈલ રિજીયન એન્ડ એપેરલ-PM MITRA) પાર્ક’ દેશના સાત રાજ્યોમાં સ્થપાશે, જેના ભાગરૂપે ગુજરાતના નવસારીના જલાલપોર તાલુકાના વાંસીબોરસી ખાતે ૧૧૪૧ એકરમાં પી.એમ. મિત્ર પાર્કના નિર્માણ માટે સુરત ખાતે રાજ્ય અને કેન્દ્ર સરકાર વચ્ચે એમ.ઓ.યુ. થયા છે. મુખ્યમંત્રી ભૂપેન્દ્ર પટેલ અને કેન્દ્રીય ઉદ્યોગમંત્રીશ્રી પિયુષ ગોયલની ઉપસ્થિતિમાં વીર નર્મદ યુનિવર્સિટીના કન્વેન્શન હોલ ખાતે આયોજિત એમ.ઓ.યુ. સમારોહમાં રાજ્યના ઉદ્યોગ અને ખાણ વિભાગના સચિવશ્રી એસ.જે. હૈદર અને કેન્દ્રીય ટેક્ષ્ટાઈલ મંત્રાલયના અધિક સચિવ રોહિત કંસલ દ્વારા એમ.ઓ.યુ. પર હસ્તાક્ષર કરવામાં આવ્યા હતા.

વાંસીબોરસીમાં સાકાર થનાર આ પાર્કમાં એક જ સ્થળે, એક જ છત્ર નીચે સ્પિનિંગ, વિવીંગ, પ્રોસેસિંગ/ડાઈંગ અને પ્રિન્ટિંગથી લઈને ગાર્મેન્ટ મેન્યુફેક્ચરિંગ સુધીની ઈન્ટિગ્રેટેડ ટેક્ષ્ટાઈલ વેલ્યુ ચેઈન ઉભી થશે. વિશ્વ કક્ષાનું ‘પ્લગ એન્ડ પ્લે’ ઈન્ફ્રાસ્ટ્રક્ચર ઉપલબ્ધ થશે. અહીં ટ્રેનિંગ, રિસર્ચ અને ઈનોવેશનનો ત્રિવેણી સંગમ સર્જાશે. આ પાર્ક ટેક્ષ્ટાઈલ સેક્ટરની તંદુરસ્ત હરિફાઈને ઉત્તેજન આપી નિકાસને વેગ આપશે.

ગુજરાતના ઔદ્યોગિક વિકાસની ઐતિહાસિક ક્ષણ: ટેક્ષ્ટાઈલ ક્ષેત્રમાં નવી ક્રાંતિના મંડાણ : મુખ્યમંત્રી ભૂપેન્દ્ર પટેલ

આ પ્રસંગે મુખ્યમંત્રી ભૂપેન્દ્ર પટેલે જણાવ્યું હતું કે, વડાપ્રધાનશ્રી નરેન્દ્રભાઈ મોદીએ ભારતને ગ્લોબલ ટેક્ષટાઈલ હબ બનાવવાનો સંકલ્પ કર્યો છે. તેમણે પી.એમ. મિત્ર પાર્કના માધ્યમથી દુનિયાના સૌથી જૂના ઉદ્યોગો પૈકીનો એક કાપડ ઉદ્યોગને વર્તમાન સમય અનુરૂપ અને આવનારા સમય સાથે તાલમેલ સાધવા આધુનિકીકરણનો માર્ગ અખત્યાર કર્યો છે. ‘સૌના સાથ, સૌના વિકાસ, સૌના વિશ્વાસ અને સૌના પ્રયાસ’ના મંત્રથી કેન્દ્ર અને રાજ્ય સરકારો વિકાસ પથ પર આગળ વધી હોલિસ્ટીક ડેવલપમેન્ટ માટે સજ્જ બન્યા છે જેનો આનંદ વ્યક્ત કરતા તેમણે ઉમેર્યું કે, નવસારી જિલ્લાના જલાલપોર તાલુકાના વાંસી બોરસી ખાતે ૧૧૪૧ એકરમાં સાકાર થનાર મેગા ઈન્ટીગ્રેટેડ એપરલ પાર્ક દક્ષિણ ગુજરાત સહિત સમગ્ર રાજ્યમાં રોજગારીની નવી તકોનું સર્જન કરવાની સાથે ગુજરાતના ટેક્ષ્ટાઈલ ઉદ્યોગને વેગવંતો બનાવશે. વિકાસની તેજ ગતિથી પીએમ મિત્ર પાર્ક ‘આત્મનિર્ભર ભારત માટે આત્મનિર્ભર ગુજરાત’નું નવું સીમાચિહ્ન સર કરશે એવો વિશ્વાસ તેમણે વ્યક્ત કર્યો હતો.

મુખ્યમંત્રીએ જણાવ્યું કે, ગુજરાત કાપડ ઉત્પાદન અને વ્યાપારનું મહત્વપૂર્ણ કેન્દ્ર રહ્યું છે, અને દુનિયાભરમાં ‘પૂર્વનું માન્ચેસ્ટર’, ‘ટેક્ષટાઈલ સ્ટેટ ઑફ ઈન્ડિયા’ અને ‘ભારતના ડેનિમ કેપિટલ’ તરીકેની આગવી નામના ધરાવે છે. ગુજરાતની કાપડ ઉદ્યોગની સિદ્ધિઓ વર્ણવતા તેમણે જણાવ્યું કે, ગુજરાત દેશની ટેક્ષટાઈલ ઈન્ડસ્ટ્રીઝની કુલ નિકાસમાં બીજું સ્થાન ધરાવે છે. દેશભરના ડેનિમ કાપડનું ૬૦ થી ૭૦ ટકા ઉત્પાદન એકલું ગુજરાત કરે છે, જે સમગ્ર દેશમાં પ્રથમ અને વિશ્વમાં ત્રીજા સ્થાને છે. ઉપરાંત, દેશના કપાસનું ૩૭ ટકા ઉત્પાદન ગુજરાત કરે છે, અને દેશમાંથી થતી કપાસની નિકાસમાં ૬૦ ટકા ફાળો આપે છે.

દેશના કુલ મેન મેડ કોટન ફાઈબર ઉત્પાદનમાં ગુજરાતનો ફાળો પ ટકા છે, જ્યારે સિન્થેટીક ફાઈબરના ઉત્પાદનના કિસ્સામાં સૌથી મોટો ફાળા આપતા રાજ્ય તરીકે વુવન ફાઈબર ઉત્પાદનમાં 30 ટકા ફાળા સાથે અગ્રસ્થાને છે.જંબુસરમાં બલ્ક ડ્રગ પાર્ક, રાજકોટમાં મેડિકલ ડિવાઈસ પાર્ક, ભાવનગરમાં વ્હીકલ સ્ક્રેપેજ રિસાયકલિંગ પાર્ક, મોરબીમાં સિરામીક પાર્ક અને બનાસકાંઠામાં એગ્રો ફૂડ પાર્ક સહિત અનેક નવા ઔદ્યોગિક પાર્ક આગામી સમયમાં ગુજરાતની વિકાસગાથાને વધુ ઉજ્જવળ બનાવશે એમ મુખ્યમંત્રીશ્રીએ રાજ્યની વિકાસલક્ષી નીતિઓ વર્ણવતા કહ્યું હતું.

પી.એમ. મિત્ર પાર્ક ‘મેક ઈન ઈન્ડિયા’ અને ‘મેક ફોર ધ વર્લ્ડ’નું વિઝન સાકાર કરશે. ટેક્ષ્ટાઈલ પાર્ક માટે નવસારી જિલ્લાનું વાંસીબોરસી સર્વાધિક અનૂકુળ હોવાથી પસંદ કર્યું છે, અહીં ૧૧૪૧ એકરમાં સાકાર થનાર પાર્ક દક્ષિણ ગુજરાત સહિત રાજ્યના વિકાસની નવી રાહ કંડારશે એમ જણાવી મુખ્યમંત્રીશ્રીએ પીએમ મિત્ર પાર્કની સ્થાપના માટે ગુજરાતની પસંદગી કરવા બદલ વડાપ્રધાનશ્રી અને કેન્દ્રીય ઉદ્યોગ મંત્રી પ્રત્યે આભારની લાગણી વ્યક્ત કરી હતી.

પી.એમ. મિત્ર પાર્કથી સર્ક્યુલર ઈકોનોમીને વેગ મળશે : કેન્દ્રીય વાણિજ્ય અને ઉદ્યોગમંત્રી પિયુષ ગોયલ

આ પ્રસંગે કેન્દ્રીય વાણિજ્ય અને ઉદ્યોગમંત્રી પિયુષ ગોયલે જણાવ્યું કે, PM મિત્ર પાર્ક એક આગવું ઔદ્યોગિક મોડેલ બનશે, જ્યાં કેન્દ્ર અને રાજ્ય સરકારો કાપડ ઉદ્યોગમાં રોકાણ વધારવા, નવીનતાને પ્રોત્સાહન આપવા, રોજગારીની તકો ઊભી કરવા, ભારતને કાપડ ઉત્પાદન અને નિકાસ માટે વૈશ્વિક હબ બનાવવા માટે સાથે મળીને કામ કરશે. ઉદ્યોગ પ્રોત્સાહન નીતિ હેઠળ આપવામાં આવતા તમામ લાભો પાર્કમાં ઉપલબ્ધ કરાવવામાં આવશે.

મંત્રીએ ગુજરાતના ચોમેર વિકાસની સરાહના કરતા કહ્યું કે, ગુજરાત લોજીસ્ટીક, નેશનલ સ્ટાર્ટ અપ ઈન્ડેક્સ, ગુંડ ગવર્નન્સ, ઈઝ ઓફ ડુઈંગ બિઝનેસ, નિકાસ જેવા ક્ષેત્રોમાં અવ્વલ છે અને માળખાગત સુવિધાઓમાં અભૂતપૂર્વ વિકાસ થયો છે. પી.એમ. મિત્ર પાર્કથી નવસારી જિલ્લામાં વિશ્વ કક્ષાનું ‘પ્લગ એન્ડ પ્લે’ ઈન્ફ્રાસ્ટ્રક્ચર ઉપલબ્ધ થશે સર્ક્યુલર ઈકોનોમીને વેગ મળશે એમ તેમણે ઉમેર્યું હતું.  વડાપ્રધાનના યશસ્વી નેતૃત્વમાં ભારતની વિદેશનીતિનો વિશ્વમાં ડંકો વાગી રહ્યો છે. ચૌમુખી વિકાસની હારમાળા સર્જનાર વડાપ્રધાનની તાજેતરની અમેરિકા મુલાકાત દરમિયાન સમગ્ર અમેરિકન સંસદ, સ્થાનિક જનતા દ્વારા અભૂતપૂર્વ સ્વાગત સન્માન કરાયું, ‘નરેન્દ્રભાઈ ઈઝ ધ બોસ’ એવા ઉદ્દગારોથી તેમને બિરદાવવામાં આવ્યા, જે દરેક ભારતીય માટે ગૌરવભરી ઘટના હોવાનું ગોયલે કહ્યું હતું. કેન્દ્રીય રેલવે અને ટેક્ષ્ટાઈલ રાજ્યમંત્રી શ્રીમતિ દર્શનાબેન જરદોશે જણાવ્યું કે, PM મિત્ર પાર્ક યોજનાનો ઉદ્દેશ્ય પ્રધાનમંત્રી શ્રી નરેન્દ્ર મોદીના આત્મનિર્ભર ભારત નિર્માણના વિઝનને સાકાર કરવાનો અને વૈશ્વિક કાપડના નકશા પર ભારતને મજબૂત સ્થાન આપવાનો છે.

વડાપ્રધાનશ્રીના ‘આત્મનિર્ભર ભારત નિર્માણ’ના વિઝનને સાકાર કરવાનો PM મિત્ર પાર્ક યોજનાનો ઉદ્દેશ્ય: કેન્દ્રીય ટેક્ષ્ટાઈલ રાજ્યમંત્રી દર્શનાબેન જરદોશ

કેન્દ્રીય મંત્રી જરદોશે કહ્યું કે, PM મિત્ર યોજના વડાપ્રધાનશ્રીના ‘આત્મનિર્ભર ભારત’ના વિઝનને પરિપૂર્ણ કરવા અને કાપડ ઉદ્યોગના વૈશ્વિક નકશા પર ભારતને અગ્રિમ સ્થાન આપશે. મિત્ર પાર્ક એક જ સ્થળે, એક જ છત્ર નીચે સ્પિનિંગ, વિવીંગ, પ્રોસેસિંગ/ડાઈંગ અને પ્રિન્ટિંગથી લઈને ગાર્મેન્ટ મેન્યુફેક્ચરિંગ સુધીની ઈન્ટિગ્રેટેડ ટેક્ષ્ટાઈલ વેલ્યુ ચેઈન બનાવશે. આ ઈન્ટીગ્રેટેડ ટેક્ષ્ટાઈલ વેલ્યુ ચેઈન ઉદ્યોગના લોજિસ્ટિક્સ ખર્ચમાં ઘટાડો કરશે. ભારત સરકારે ભારતની ઉત્પાદન ક્ષમતા વધારવા અને નિકાસ વધારવા માટે ટેક્ષ્ટાઈલ ઉત્પાદનો, એટલે કે MMF એપેરલ, MMF ફેબ્રિક્સ અને ટેકનિકલ ટેક્સટાઈલ ઉત્પાદનો માટે ઉત્પાદન-લિંક્ડ ઈન્સેન્ટિવ (PLI) યોજનાને મંજૂરી આપી છે, ત્યારે આ યોજનામાં જોડાયેલા ૮૬ પૈકી ૧૩ ઈન્વેસ્ટરો માત્ર સુરતના છે.

ગુજરાતના ઉદ્યોગ મંત્રી બલવંતસિંહ રાજપૂતે જણાવ્યું હતું કે, વડાપ્રધાનશ્રી નરેન્દ્ર મોદી ગુજરાતના મુખ્યમંત્રી તરીકેના કાર્યકાળથી જ હંમેશા ગુજરાતના વિકાસ માટે ચિંતિત રહ્યા છે. તેમની દુરંદેશિતાને પગલે આગળ વધી મુખ્યમંત્રીશ્રી ભુપેન્દ્રભાઈ પટેલની આગેવાનીમાં ગુજરાત રાજ્ય વિકાસના પથ પર સતત આગળ વધી રહ્યું છે. સમગ્ર દેશમાં નિર્માણ પામનારા ૭ પી.એમ. મિત્ર પાર્ક પૈકીનો એક પાર્ક ગુજરાતને મળ્યો જે આપણા સૌ માટે ગૌરવની બાબત છે. ભારત સમગ્ર વિશ્વમાં વિકાસની દિશામાં આગળ વધી રહ્યું છે તેમાં ગુજરાતનો પણ ખૂબ મોટો ફાળો રહ્યો છે. ગુજરાતમાં રોકાણ માટે વિશ્વના રોકાણકારો આગળ આવી રહ્યા છે. તેના કારણે ગુજરાતના ઉદ્યોગ ક્ષેત્રે અનેક સફળતાઓ સાંપડી છે, અને રાજ્યમાં રોજગારી સર્જન કરવા સાથે દેશના જીડીપી ગ્રોથ વધારવામાં મહત્વની ભૂમિકા ભજવી છે.ઉદ્યોગમંત્રી રાજપુતે પર્યાવરણની જાળવણી સાથે રોજગાર સર્જનમાં અગ્રેસર ગુજરાતમાં રોકાણકારોને આવકારી ૧૦૦ દિવસનો લક્ષ્યાંક નક્કી કરતા અનેક એમ.ઓ.યુ. કરીને સ્થાનિક ઉદ્યોગકારોને પણ બળ પુરૂં પાડ્યું છે તેમ ઉમેર્યું હતું.

દેશની વસ્તીમાં પાંચ ટકા, અને ભૌગોલિક ક્ષેત્રફળમાં છ ટકા હિસ્સો ધરાવતું ગુજરાત દેશની જી.ડી.પી.માં ૮.૪ ટકાનું માતબર યોગદાન આપે છે એમ ગૃહ રાજ્યમંત્રીશ્રી હર્ષ સંઘવીએ જણાવ્યું હતું. તેમણે વધુમાં કહ્યું કે, PM મિત્ર પાર્કની પરિકલ્પનાથી વડાપ્રધાનશ્રીએ માત્ર વર્તમાન વ્યાપારી સમૂહોની જ નહીં, પણ ભાવિ પેઢીના સોનેરી ભવિષ્યને સુનિશ્ચિત કર્યું છે. આહવાથી ઉભરાટને જોડતા બ્રિજને પણ મંજૂરી મળી ચૂકી છે, જે કાપડ ઉદ્યોગકારો માટે સુગમ કનેક્ટિવિટી પૂરી પાડશે. દેશના સાત પાર્ક્સ પૈકી વાંસી બોરસી પાર્ક ઝડપભેર સાકાર થાય એવા સઘન પ્રયાસો કરીને પાર્કને ઝડપભેર કાર્યરત કરવામાં અગ્ર સ્થાને રહેવાનો દ્રઢ નિર્ધાર તેમણે વ્યક્ત કર્યો હતો.

ઉદ્યોગકારો માટે ગુજરાત સૌથી વધુ સુરક્ષિત રાજ્ય: રોકાણ માટે ગુજરાત સૌથી શ્રેષ્ઠ રાજ્ય બન્યું છે: સાંસદ સી.આર. પાટીલ

સાંસદ સી.આર.પાટીલે જણાવ્યું કે, ઉદ્યોગકારો, વ્યાપારીઓ રજૂઆતો કે માંગણી કરે એ પહેલા જ તેમની માંગણીઓને પારખી લઈને માંગ્યા વિના જ સુવિધાઓ આપવાની કાર્યપદ્ધતિ રાજ્ય સરકારે વિકસાવી છે. દર વર્ષે માત્ર ત્રણ ટકા જ પાણીમાં ભાવ વધારો થાય એવો ઉદ્યોગકારોને અત્યંત રાહત આપતો નિર્ણય એ તેનું પ્રત્યક્ષ ઉદાહરણ છે. ઉદ્યોગકારોની આ પાર્કમાં રોકાણ માટેનો ઉત્સાહ અને માંગ જોતા ૧૧૪૧ એકર જમીન ઓછી પડશે જેથી હજુ વધુ જમીનની તીવ્ર આવશ્યકતા રહેશે એમ તેમણે ઉમેર્યું હતું.

પાટિલે જણાવ્યું કે, ઉદ્યોગકારો માટે વ્યવસાયની સુરક્ષા માટે ગુજરાત રાજ્ય સૌથી વધુ અનૂકુળ રહ્યું છે. રોકાણ માટે ગુજરાત સૌથી શ્રેષ્ઠ રાજ્ય બન્યું છે, જ્યારે ઉદ્યોગ ક્ષેત્રે સ્કીલ્ડ લેબર સૌથી વધુ પ્રમાણમાં સુરતમાં ઉપલબ્ધ છે, જેના થકી રાજ્યની અર્થવ્યવસ્થાને મોટો લાભ થશે. આ વેળાએ PM મિત્ર પાર્કના વિઝન અને મિશનની વિગતો આપતા બ્રોશરનું મુખ્યમંત્રી અને કેન્દ્રીય ઉદ્યોગ મંત્રી સહિત મહાનુભાવોના હસ્તે અનાવરણ કરવામાં આવ્યું હતું. તેમજ ‘PM મિત્ર યોજના’ની જાણકારી આપતી વિડીયોફિલ્મનું નિદર્શન સૌએ નિહાળ્યું હતું.

કાર્યક્રમમાં અગ્રણી ટેક્ષ્ટાઈલ ઉદ્યોગકાર પુનિત લાલભાઈ(અરવિંદ મિલ) અને બાલકૃષ્ણ ગોએન્કા(વેલસ્પન ગ્રુપ) એ PM મિત્ર પાર્ક અંગે ખુશી વ્યક્ત કરી પ્રોત્સાહક પ્રતિભાવો આપ્યા હતા. આ સમારોહમાં મોટી સંખ્યામાં ઉપસ્થિત ઉદ્યોગપતિઓએ રોકાણ માટે ઉત્સાહ અને  રૂચિ દર્શાવી હતી. પ્રારંભે કેન્દ્રીય ટેક્ષ્ટાઈલ મંત્રાલયના સચિવ રચના શાહે સ્વાગત ઉદ્દબોધન કરી મહાનુભાવોને આવકારી પી.એમ. મિત્ર પાર્કની વિસ્તૃત રૂપરેખા આપી હતી. કાર્યક્રમના અંતે રાજ્યના ઉદ્યોગ અને ખાણ વિભાગના સચિવ એસ.જે. હૈદરે આભારવિધિ કરી હતી.

આ પ્રસંગે નાણામંત્રી કનુભાઈ દેસાઈ, વન અને પર્યાવરણ રાજ્યમંત્રી મુકેશભાઈ પટેલ, વલસાડના સાંસદ કે.સી.પટેલ, મુખ્ય સચિવ રાજકુમાર, મુખ્યમંત્રીના મુખ્ય અગ્ર સચિવ એમ.કૈલાસનાથન, GIDCના ઉપાધ્યક્ષ અને મેનેજિંગ ડિરેક્ટર ડો.રાહુલ ગુપ્તા, મેયર હેમાલીબેન બોઘાવાલા, જિલ્લા કલેક્ટર આયુષ ઓક, પોલીસ કમિશનર અજય તોમર, મ્યુ.કમિશનર શાલિની અગ્રવાલ, GIDCના જોઈન્ટ ડિરેક્ટરએન.કે.મીણા  સહિત ધારાસભ્યશ્રીઓ, GIDC ના અધિકારીઓ સહિત કાપડ ઉદ્યોગકારો ઉપસ્થિત રહ્યા હતા.

દેશના સાત રાજ્યોમાં સાકાર થશે પી.એમ. મિત્ર પાર્ક

કેન્દ્રીય કાપડ મંત્રાલય દ્વારા ઉચ્ચ માપદંડોના આધારે પાર્ક માટેની પસંદગી પામેલા સાત રાજ્યો તમિલનાડુ (વિરૂધુનગર), તેલંગાણા (વારંગલ), ગુજરાત (નવસારી), કર્ણાટક (કાલાબુર્ગી), મધ્યપ્રદેશ (ધાર), ઉત્તરપ્રદેશ (લખનૌ) અને મહારાષ્ટ્ર (અમરાવતી)માં પાર્ક સાકાર થશે. પીએમ મિત્ર પાર્કમાં વિશ્વ કક્ષાનું ઔદ્યોગિક ઈન્ફ્રાસ્ટ્રક્ચર ‘કટીંગ એજ ટેક્નોલોજી’ને આકર્ષિત કરશે અને ટેક્ષ્ટાઈલ સેક્ટરમાં સીધા વિદેશી મૂડી રોકાણ (એફડીઆઈ) અને સ્થાનિક રોકાણને વેગ આપશે.