બોલિવૂડની ફિલ્મમાં ઝળકશે સુરતની સાઈધારાનો ફેશન દમ

સુરત : બોલિવૂડની આગામી ફિલ્મ ‘ગણેશ: ડસ્ટ ટુ સ્ટારડમ’માં સુરતના ટેક્સટાઇલ ઉદ્યોગની ઝલક જોવા મળશે. જાણીતા કોરિયોગ્રાફર ગણેશ આચાર્યની આ ફિલ્મ માટે સુરતની સાઈધારા એનએક્સ પ્રાઇવેટ લિમિટેડ દ્વારા કપડાં અને કોસ્ચ્યુમ માટે જરૂરી સામગ્રી ઉપલબ્ધ કરાવવામાં આવશે. ફિલ્મ 11 ડિસેમ્બર, 2026ના રોજ રિલીઝ થવાની છે.

સુરતની કંપનીની આ ફિલ્મ માટે પસંદગી થવી શહેરના ટેક્સટાઇલ ઉદ્યોગ માટે ગૌરવની બાબત છે. આના કારણે બોલિવૂડમાં સુરતના કપડાં અને ફેશન ક્ષેત્રને નવી ઓળખ મળવાની સાથે વેપાર માટે નવી તકો પણ ઊભી થઈ શકે છે.

ફિલ્મના સંદર્ભમાં જાણીતા કોરિયોગ્રાફર ગણેશ આચાર્યએ સાઈધારા એનએક્સ પ્રાઇવેટ લિમિટેડના પ્રતિનિધિઓ સાથે મુલાકાત કરી હતી. આ પ્રસંગે કંપનીના ડિરેક્ટર અને ઉદ્યોગપતિ રવિભાઈ રાજપૂતે તેમનું સ્વાગત કરી સન્માન કર્યું હતું.

ફિલ્મમાં સુકેશા કલાન, સાક્ષી પવારકર, શિવાંશુ સોની અને આલોક શૉ સહિતના કલાકારો જોવા મળશે. ફિલ્મના માધ્યમથી સુરતના કાપડ ઉદ્યોગને પોતાના ઉત્પાદનો અને ફેશનની ક્ષમતા રાષ્ટ્રીય સ્તરે રજૂ કરવાની તક મળશે.

સુરત લાંબા સમયથી કાપડ ઉત્પાદન અને વેપારના મુખ્ય કેન્દ્ર તરીકે ઓળખાય છે. હવે બોલિવૂડ સાથેના આ જોડાણથી સુરતના ટેક્સટાઇલ ઉદ્યોગને નવી ઓળખ અને વ્યવસાયિક તકો મળવાની આશા છે.