ઉકાઈમાં 4.89 લાખ ક્યુસેક પાણીની આવક, 18 કલાકમાં જળસપાટી 4.58 ફૂટ વધી
ઉપરવાસના ભારે વરસાદથી ઉકાઈ ડેમ 323.96 ફૂટે પહોંચ્યો; તાપી નદી પર સતત મોનિટરિંગ, જિલ્લા તંત્ર હાઈએલર્ટ પર
સુરત: દક્ષિણ ગુજરાત તેમજ મધ્ય પ્રદેશ-મહારાષ્ટ્રના કેચમેન્ટ વિસ્તારમાં સતત વરસી રહેલા ભારે વરસાદને કારણે ઉકાઈ ડેમમાં પાણીની આવકમાં સતત વધારો થઈ રહ્યો છે. શનિવારે સાંજે 6 વાગ્યાની સ્થિતિ મુજબ ઉકાઈ ડેમમાં 4,89,030 ક્યુસેક પાણીની આવક નોંધાઈ હતી, જ્યારે માત્ર 800 ક્યુસેક પાણી છોડવામાં આવી રહ્યું છે. છેલ્લા 18 કલાકમાં ડેમની જળસપાટીમાં 4.58 ફૂટનો નોંધપાત્ર વધારો થતાં સપાટી 323.96 ફૂટે પહોંચી છે.
ઉકાઈ ડેમનું રૂલ લેવલ 333 ફૂટ હોવાથી પાણીની સતત આવકને ધ્યાનમાં રાખી તંત્ર દ્વારા સ્થિતિ પર સતત નજર રાખવામાં આવી રહી છે. સાથે જ નીચાણવાળા વિસ્તારોમાં રહેતા લોકોને સાવચેત રહેવા અને જરૂરી સૂચનાઓનું પાલન કરવા અપીલ કરવામાં આવી છે.
સુરત શહેરના કતારગામ અને રાંદેરને જોડતા તાપી નદી પર આવેલા વિયર-કમ-કોઝવેની સપાટી પણ વધીને 7.52 મીટરે પહોંચી છે. કોઝવે પરથી હાલ 86,536 ક્યુસેક પાણી તાપી નદીમાં વહે છે.
જિલ્લામાં અવિરત વરસાદ અને ઉપરવાસમાંથી વધતી પાણીની આવકને પગલે સુરત જિલ્લા વહીવટી તંત્ર સંપૂર્ણ હાઈએલર્ટ પર છે. ઉકાઈ ડેમ તેમજ તાપી નદીની સ્થિતિ પર સતત મોનિટરિંગ કરવામાં આવી રહ્યું છે અને નાગરિકોને સુરક્ષિત સ્થળોએ રહેવા તંત્ર દ્વારા અપીલ કરવામાં આવી છે.
