ગુજરાતના ફ્રોઝન ફૂડ નિકાસ ક્ષેત્રને મળી સ્પેશિયલ રેલ-ટુ-પોર્ટ કોલ્ડ ચેઈન કોરિડોરની ભેટ
અત્યાધુનિક કોલ્ડ ચેઈન લોજિસ્ટિક્સ માટે સીમાચિહ્ન
અમદાવાદ : અદાણી પોર્ટ્સ એન્ડ સ્પેશિયલ ઈકોનોમિક ઝોન લિમિટેડ (APSEZ) ની સંકલિત લોજિસ્ટિક્સ પાંખ ‘અદાણી લોજિસ્ટિક્સ લિમિટેડ’ (ALL) દ્વારા હાયફન ફૂડ્સની નિકાસ માટે ગુજરાતના આઈસીડી વિરોચનનગરને મુંદ્રા પોર્ટ સાથે જોડતો ખાસ રીફર રેલ કોરિડોર શરૂ કરાયો છે. દેશની પ્રથમ ખાસ (રેફ્રિજરેટેડ) કન્ટેનર ટ્રેનને લીલી ઝંડી બતાવી પ્રસ્થાન કરાવ્યું છે. આ પહેલ ભારતના ફ્રોઝન ફૂડ નિકાસ માટે ટકાઉ અને અત્યાધુનિક કોલ્ડ ચેઈન લોજિસ્ટિક્સ કોરિડોરના નિર્માણમાં મોટું સીમાચિહ્ન સાબિત થશે.
આ નવો પ્રોજેક્ટ હાયફન ફૂડ્સ, અદાણી લોજિસ્ટિક્સ અને વૈશ્વિક શિપિંગ અગ્રણી એવરગ્રીન મરીન કોર્પોરેશન વચ્ચેની વ્યૂહાત્મક ભાગીદારીનું પરિણામ છે. આ ત્રિપક્ષીય ભાગીદારીનો મુખ્ય ઉદ્દેશ્ય રેલ-ટુ-પોર્ટ સપ્લાય ચેઈન દ્વારા ફ્રોઝન અને સંવેદનશીલ એવા કાર્ગોના પરિવહનમાં વ્યાપક સુધારો કરવાનો છે એટલું જ નહીં, તેનાથી ભારતના તાજા અને ગુણવત્તાયુક્ત શાકભાજી તેમજ અન્ય પ્રોસેસ્ડ ફ્રોઝન ફૂડ પ્રોડક્ટ્સને વિશ્વભરમાં તાજા અને સુરક્ષિત પહોંચાડવામાં મદદ મળશે.
આ ખાસ રીફર ટ્રેન દ્વારા ફ્રોઝન કાર્ગો મલેશિયા, સિંગાપોર, દક્ષિણ કોરિયા, જાપાન, તાઇવાન અને ઇન્ડોનેશિયા જેવા અગ્રણી આંતરરાષ્ટ્રીય બજારોમાં મોકલવામાં આવશે. જેને વિશ્વની સૌથી પ્રખ્યાત બ્રાન્ડ્સ જેવી કે પીઝા હટ (Pizza Hut), બર્ગર કિંગ (Burger King), ટેકો બેલ (Taco Bell), સબવે (Subway), આઈકિયા (IKEA) અને કેએફસી (KFC) ને સપ્લાય કરવામાં આવશે.
આ નવીન રેલ સેવા દ્વારા રોડ ટ્રાન્સપોર્ટને બદલે રેલવેનો ઉપયોગ વધશે, જેનાથી પ્રદૂષણમાં મોટો ઘટાડો થશે અને કાર્બન ઉત્સર્જન ઘટશે. આ ટ્રેન મુસાફરી દરમિયાન ચોક્કસ તાપમાન જાળવી રાખશે, જેથી માલની ગુણવત્તા બગડશે નહીં અને સમયસર ડિલિવરી સુનિશ્ચિત થશે.
આ પહેલમાં અદાણી લોજિસ્ટિક્સ લિમિટેડ (ALL) ની ભૂમિકા માત્ર પરિવહન પૂરતી મર્યાદિત નથી. કંપનીએ નિકાસકારો અને ઉત્પાદકોને એન્ડ-ટુ-એન્ડ સપ્લાય ચેઈન સોલ્યુશન્સ પૂરા પાડવા માટે બંદરો, ઈનલેન્ડ કન્ટેનર ડેપો, રેલ કનેક્ટિવિટી અને વેરહાઉસિંગ ક્ષેત્રે પોતાના મલ્ટિમોડલ લોજિસ્ટિક્સ ઈન્ફ્રાસ્ટ્રક્ચરનો સતત વિસ્તાર કર્યો છે.
સાણંદ, વિરમગામ અને કડી જેવા ઔદ્યોગિક હબની નજીક આવેલું અદાણી આઈસીડી વિરોચનનગર વાર્ષિક ૯૨,૪૦૦ કન્ટેનર (TEUs) હેન્ડલ કરવાની ક્ષમતા ધરાવે છે. વ્યૂહાત્મક કનેક્ટિવિટીના ફાયદા અને મલ્ટિમોડલ ઇન્ફ્રાસ્ટ્રક્ચર ક્ષમતાઓને કારણે તે વધુ પ્રખ્યાત બન્યું છે. આ ટર્મિનલ દેશનું પ્રથમ ‘ઝીરો ટચ કસ્ટમર એક્સપિરિયન્સ’ પ્રોગ્રામ ધરાવતું કેન્દ્ર છે. મુંદ્રા અને પીપાવાવ બંદરો માટે તે આયાત-નિકાસ કનેક્ટિવિટી પૂરી પાડે છે, જ્યારે ડોમેસ્ટિક કાર્ગો રૂટને ડંકુની, કોલકાતા, જીરાનિયા (ત્રિપુરા), હલ્દિયા અને બાયહાટા જેવા સ્થળો સાથે જોડે છે.
ભારત વેપાર સ્પર્ધાત્મકતા મજબૂત કરવા સુદૃઢ સપ્લાય ચેઈન બનાવવા પ્રયત્નશીલ છે, ત્યારે આ સ્પેશિયલ કોરિડોર નિકાસને ટેકો આપવા ભવિષ્ય માટે તૈયાર મલ્ટિમોડલ ઈન્ફ્રાસ્ટ્રક્ચર બનાવવામાં અદાણી લોજિસ્ટિક્સ લિમિટેડ (ALL) ની સતત વધી રહેલી ભૂમિકાને રેખાંકિત કરે છે.
