સુરત: વિદ્યાર્થીઓને હર હંમેશ કઈક નવું જ્ઞાન આપવા માટે જાણીતી શહેરની ખ્યાતનામ ટી એમ પટેલ ઇન્ટનેશનલ સ્કૂલ દ્વારા આ વખતે ધોરણ ૯ થી ૧૨ ના વિદ્યાર્થીઓએ સુરત ખાતે આયોજિત ગુજરાત ગ્લોબલ એક્સ્પો ની શૈક્ષણિક મુલાકાત લીધી. આ મુલાકાત દરમિયાન વિદ્યાર્થીઓને વિવિધ કારકિર્દી વિકલ્પો, સરકારી વિભાગોની કામગીરી તેમજ ભારતના સર્વાંગી વિકાસ અંગે મહત્વપૂર્ણ માહિતી મળી.
એક્સ્પોમાં વિદ્યાર્થીઓને ડિફેન્સ, રેલવે, હેલ્થકેર, ટેક્નોલોજી સહિત અનેક ક્ષેત્રોના આગેવાનો અને અધિકારીઓ સાથે સીધી વાતચીત કરવાની અનોખી તક મળી. આ પ્રતિનિધિઓએ વિદ્યાર્થીઓને વિવિધ વ્યવસાયોમાં સફળતા મેળવવા માટે જરૂરી કુશળતાઓ, યોગ્ય શિક્ષણ અને સમર્પણ વિશે માર્ગદર્શન આપ્યું.
આ શૈક્ષણિક મુલાકાત અંતે તમામ વિદ્યાર્થીઓને સર્ટિફિકેટ ઓફ પાર્ટિસિપેશન એનાયત કરવામાં આવ્યા, જેના કારણે આ અનુભવ વધુ મૂલ્યવાન અને પ્રેરણાદાયક બન્યો. આ પ્રકારની પ્રવૃત્તિઓ વિદ્યાર્થીઓના દૃષ્ટિકોણને વિસ્તૃત કરી તેમના ભવિષ્યના લક્ષ્યોને વધુ સ્પષ્ટ બનાવવામાં સહાયક સાબિત થાય છે.
આ શૈક્ષણિક એક્સ્પો અંગે ટી. એમ. પટેલ ઇન્ટરનેશનલ સ્કૂલ ના ડિરેક્ટર અને પ્રિન્સિપાલ કે. મનોહર મેક્સવેલ એ જણાવ્યું કે વિકાસની હરણફાળ ભરતા આપના પોતાના શહેર સુરતમાં આ પ્રકારનો એક્સ્પો વિદ્યાર્થીઓ માટે જ્ઞાન પ્રાપ્ત કરવાનું શ્રેષ્ઠ માધ્યમ છે અને ટી એમ પટેલ ઇન્ટરનેશનલ સ્કૂલ ના વિદ્યાર્થીઓ હંમેશા એક સારું અને જીવન ઉપયોગી વાતો શીખવા માટે અગ્રહરોળમાં જ રહે છે.
