સુરત જિલ્લામાંથી માર્ચ મહિના દરમિયાન ૧ બાળશ્રમિક અને ૩ તરૂણશ્રમિકોનું પુનર્વસન
જિલ્લા કલેકટર ડો.સૌરભ પારધીની અધ્યક્ષતામાં ચાઈલ્ડ લેબર ટાસ્ક ફોર્સ કમિટીની બેઠક યોજાઈ
![](https://divyagujarati.com/wp-content/uploads/2024/05/WhatsApp-Image-2024-05-30-at-17.14.54.jpeg)
સુરત: જિલ્લા કલેકટર ડો.સૌરભ પારધીની અધ્યક્ષતામાં કલેક્ટર કચેરીના સભાખંડમાં ચાઈલ્ડ લેબર ટાસ્ક ફોર્સ કમિટીની બેઠક યોજાઈ હતી. જેમાં માર્ચ માસમાં બાળમજૂરી નાબૂદી અભિયાન હેઠળ કરવામાં આવેલી કામગીરીની સમીક્ષા કરવામાં આવી હતી.
બેઠકમાં કલેકટરએ બાળમજૂરીમાંથી રેસ્કયુ કરવામાં આવેલા બાળશ્રમિકોનું પુનર્વસન થાય તેમજ બાળમજુરી અંગે વધુમાં વધુ જાગૃતિ કેળવાય તે માટે સૌને સાથે મળી કાર્ય કરવાનો અનુરોધ કર્યો હતો. જોખમી ઇન્ડસ્ટ્રીઝમાં કામ કરતા બાળશ્રમિકોને રેસ્ક્યુ કરવા પર ભાર મૂકી બાળકો, તરૂણોનું ભવિષ્ય અંધકારમય ન બને એ માટે બાળમજૂરી કરાવતા લોકો સામે કડક કાયદાકીય કાર્યવાહી કરવામાં આવે તેવો મત વ્યક્ત કર્યો હતો.
બેઠકમાં મદદનીશ શ્રમ આયુક્ત એચ. એસ ગામીતે વિગતો આપતા જણાવ્યું કે, માર્ચ મહિનામાં ટાસ્કફોર્સ દ્વારા હોટેલ-રેસ્ટોરન્ટ, કરખાનાઓમાં બે રેડ કરાઈ હતી, જેમાં એક બાળશ્રમિક અને ૩ તરૂણ શ્રમિકો માલૂમ પડ્યા હતા. જેમના પુનર્વસનની કામગીરી કરવામાં આવી છે. આ બાળકો બિહારના હોવાથી બિહારમાં રહેતા તેમના માતાપિતાને સુરત બોલાવી બાળકો સાથે માતાપિતાનું કાઉન્સેલિંગ કરવામાં આવ્યું હતું અને ભવિષ્યમાં બાળક ફરી વાર બલમજૂરીના દલદલમાં ન ફસાય એ માટે સમજણ આપવામાં આવી છે એમ મદદનીશ શ્રમ આયુકત ગામીતે જણાવ્યું હતું.
બેઠકમાં જિલ્લા આરોગ્ય અધિકારી ડો. અનિલ પટેલ, જિલ્લા સમાજ સુરક્ષા અધિકારી શ્રી જિજ્ઞેશ ચૌધરી સહિત વિવિધ વિભાગના અધિકારીઓ ઉપસ્થિત રહ્યા હતા.