ચેતક સ્ક્રીન એવોર્ડ્સ: ‘ધુરંધર’ને 24 નોમિનેશન સાથે આગવી લીડ, 5 એપ્રિલના સમારંભ પહેલાં ‘સૈયારા’ અને ‘હોમબાઉન્ડ’ આગળ
સુરત: ઈન્ડિયન એક્સપ્રેસ ગ્રુપની સ્ક્રીન એકેડમીએ 5 એપ્રિલે યોજાનાર આગામી ચેતક સ્ક્રીન એવોર્ડ્સ માટે કુલ 31 કેટેગરીમાં નોમિનેશનની સંપૂર્ણ યાદી જાહેર કરી છે. આ એવોર્ડ્સ 2025 દરમિયાન રિલીઝ થયેલી હિન્દી ફિલ્મો અને ઓટીટી કન્ટેન્ટમાંથી શ્રેષ્ઠ કૃતિઓને સન્માનિત કરશે.
આદિત્ય ધરની સ્પાય થ્રિલર ફિલ્મ ‘ધુરંધર’ને સૌથી વધુ 24 નોમિનેશન મળ્યા છે. મોહિત સુરીની ‘સૈયારા’ને 17 નોમિનેશન મળ્યા છે, જ્યારે નીરજ ઘાયવાનની ‘હોમબાઉન્ડ’ને 15 નોમિનેશન મળ્યા છે. આ નોમિનેશનમાં થિયેટર તેમજ ઓટીટી બંને પ્રકારની રિલીઝનો સમાવેશ થાય છે, જે આધુનિક ભારતીય વાર્તાકથનની વ્યાપકતા અને વિકાસને દર્શાવે છે.
1995માં સ્થાપિત થયેલા સ્ક્રીન એવોર્ડ્સ સંપાદકીય નિષ્પક્ષતા પર આધારિત છે અને તેનું સંચાલન સ્ક્રીન એકેડમી દ્વારા થાય છે. આ એકેડમી એક સ્વતંત્ર, બિન-નફાકારી સંસ્થા છે જેમાં 50થી વધુ પ્રતિષ્ઠિત ફિલ્મમેકર્સ, કલાકારો અને સાંસ્કૃતિક ક્ષેત્રની જાણીતી વ્યક્તિઓ સામેલ છે. મૂલ્યાંકન પ્રક્રિયામાં એકેડમીના 95 ટકા કરતાં વધુ સભ્યોએ ભાગ લીધો હતો. દરેક કેટેગરીમાં સરેરાશ 38 થી 40 સભ્યોએ “ટ્રિમ્ડ મીન (ઓલિમ્પિક)” પદ્ધતિથી સ્કોરિંગ કર્યું હતું, જેથી નિષ્પક્ષતા અને પારદર્શિતા જળવાઈ રહે.
પ્રક્રિયાને વધુ મજબૂત બનાવવા માટે યુનિવર્સિટી ઓફ સધર્ન કેલિફોર્નિયાની સ્કૂલ ઓફ સિનેમેટિક આર્ટ્સમાં સિનેમા અને મીડિયા સ્ટડીઝ વિભાગની ચેર પ્રોફેસર પ્રિયા જયકુમારે એકેડમી સભ્યો માટે વિગતવાર સ્કોરિંગ રૂબ્રિક તૈયાર કરી હતી.
છેલ્લા 20 વર્ષમાં પહેલીવાર ફિલ્મ એવોર્ડ શૉ લાઈવ પ્રસારિત કરવામાં આવશે. યુટ્યૂબ સાથેની ખાસ ભાગીદારી દ્વારા સ્ક્રીન એવોર્ડ્સ વિશ્વભરના દર્શકો માટે ઓપનએક્સેસ સાથે પ્રસારિત થશે, જે ઈન્ડિયન એક્સપ્રેસ ગ્રુપના ડિજિટલ-ફર્સ્ટ અભિગમને અનુરૂપ છે. સાથે સાથે આ સમારંભસોની એન્ટરટેઇનમેન્ટ ટેલિવિઝન અને Sony Liv પર પણ લાઈવ પ્રસારિત થશે.
