સુરત-હજીરા : પ્રધાનમંત્રી કૌશલ્ય અને રોજગારક્ષમતા પરિવર્તન યોજના (PM-સેતુ) હેઠળ સુરત ક્લસ્ટરની પાંચ સરકારી ઔદ્યોગિક તાલીમ સંસ્થાઓ (ITI)ના આધુનિકીકરણ માટે AM/NS ઇન્ડિયાએ ભારત સરકાર અને ગુજરાત સરકાર સાથે ભાગીદારી કરાર પર હસ્તાક્ષર કર્યા છે. આ પ્રોજેક્ટ માટે રૂ. 240 કરોડનું રોકાણ મંજૂર કરવામાં આવ્યું છે. તેનો મુખ્ય ઉદ્દેશ યુવાનોને ઉદ્યોગોની જરૂરિયાત મુજબનું કૌશલ્ય પ્રદાન કરીને તેમની રોજગારક્ષમતા વધારવાનો છે.
આ કરાર સાથે પાંચેય ITIના આધુનિકીકરણની દિશામાં મહત્ત્વપૂર્ણ પગલું ભરાયું છે. પ્રોજેક્ટના અમલીકરણ માટે વિશેષ હેતુ કંપની (SPV)ની રચના કરવામાં આવશે. તેમાં AM/NS ઇન્ડિયાની 51 ટકા ભાગીદારી રહેશે, જ્યારે કેન્દ્ર સરકાર અને ગુજરાત સરકારની ભાગીદારી 24.5-24.5 ટકા રહેશે.
ગુજરાતના શ્રમ, કૌશલ્ય વિકાસ અને રોજગાર વિભાગના કેબિનેટ મંત્રી કુંવરજીભાઈ બાવળિયાએ જણાવ્યું હતું કે, આ ભાગીદારીથી સરકારી ITIમાં તાલીમ વ્યવસ્થા વધુ મજબૂત બનશે. ટેકનિકલ શિક્ષણને ઉદ્યોગો સાથે જોડવાથી યુવાનોને રોજગારની નવી તકો મળશે અને રાજ્યના ઔદ્યોગિક વિકાસનો લાભ સ્થાનિક યુવાનો સુધી પહોંચશે.
AM/NS ઇન્ડિયાના ડિરેક્ટર અને વાઇસ પ્રેસિડેન્ટ (હ્યુમન રિસોર્સિસ અને એડમિનિસ્ટ્રેશન) આશુતોષ તેલાંગે જણાવ્યું હતું કે, કંપની તેના ઉત્પાદન ક્ષેત્રના અનુભવ અને ન્યૂ એજ મેકર્સ ઇન્સ્ટિટ્યૂટ ઑફ ટેક્નોલોજી (NEMT)ની ટેકનિકલ નિપુણતાનો ઉપયોગ કરીને ITIમાં તાલીમની ગુણવત્તા સુધારશે. આધુનિક સુવિધાઓ, વ્યવહારુ તાલીમ અને પ્રશિક્ષકોના કૌશલ્ય વિકાસ દ્વારા વિદ્યાર્થીઓને ઉદ્યોગોમાં કામ કરવા માટે તૈયાર કરવામાં આવશે.
આધુનિક સુવિધાઓ અને નવા અભ્યાસક્રમો
પ્રોજેક્ટ હેઠળ તાલીમ સુવિધાઓનું આધુનિકીકરણ, વર્તમાન અભ્યાસક્રમોમાં સુધારા, નવા વ્યવસાયલક્ષી અભ્યાસક્રમો શરૂ કરવા અને પ્રશિક્ષકોને વિશેષ તાલીમ આપવાનાં કાર્યો કરવામાં આવશે. વિદ્યાર્થીઓને ઉદ્યોગોમાં ઉપયોગમાં લેવાતાં સાધનો અને કાર્યપદ્ધતિઓનો વ્યવહારુ અનુભવ પણ મળશે.
આ પ્રોજેક્ટમાં સરકારી ITI સુરત, સરકારી ITI હજીરા, સરકારી ITI બારડોલી, સરકારી મહિલા ITI સચિન અને સરકારી મહિલા ITI સુરતનો સમાવેશ થાય છે. સરકારી ITI સુરત મુખ્ય તાલીમ કેન્દ્ર તરીકે કાર્ય કરશે અને અન્ય ચાર સંસ્થાઓને સંયુક્ત સુવિધાઓ તથા સંસાધનો દ્વારા સહયોગ આપશે.
આધુનિકીકરણથી બંને મહિલા ITIની વિદ્યાર્થિનીઓને પણ લાભ મળશે. તેમને ટેકનિકલ ક્ષેત્રમાં કારકિર્દી બનાવવા માટે વધુ સારી તાલીમ અને સુવિધાઓ ઉપલબ્ધ થશે. આ ઉપરાંત, ઉદ્યોગોને જરૂરી કૌશલ્ય ધરાવતા ઉમેદવારો ઉપલબ્ધ કરાવવામાં પણ મદદ મળશે.
બે રાજ્યોની નવ ITI માટે રૂ. 440 કરોડનું રોકાણ
PM-સેતુ યોજના હેઠળ AM/NS ઇન્ડિયાએ ગુજરાત ઉપરાંત આંધ્રપ્રદેશના વિશાખાપટ્ટનમ ક્લસ્ટરની ચાર સરકારી ITIના આધુનિકીકરણ માટે પણ કરાર કર્યો છે. બંને પ્રોજેક્ટમાં કુલ નવ ITIનો સમાવેશ થાય છે અને રૂ. 440 કરોડનું રોકાણ મંજૂર કરવામાં આવ્યું છે.
કેન્દ્ર સરકારની PM-સેતુ યોજના માટે કુલ રૂ. 60,000 કરોડની જોગવાઈ કરવામાં આવી છે. આ યોજના હેઠળ ઉદ્યોગોની ભાગીદારીથી દેશની 1,000 સરકારી ITIનું આધુનિકીકરણ તથા પાંચ રાષ્ટ્રીય કૌશલ્ય તાલીમ સંસ્થાઓને મજબૂત બનાવવાનો લક્ષ્યાંક છે. તેનો હેતુ યુવાનોને આધુનિક ઉદ્યોગોની જરૂરિયાત મુજબનાં વ્યવહારુ કૌશલ્યો આપીને રોજગાર માટે વધુ સક્ષમ બનાવવાનો છે.
