સુરત: સરદાર વલ્લભભાઈ નેશનલ ઇન્સ્ટિટ્યૂટ ઑફ ટેક્નોલોજી (SVNIT)-સુરત અને આર્સેલર મિત્તલ નિપ્પોન સ્ટીલ ઇન્ડિયા (AM/NS India)એ સંયુક્ત રીતે જિલ્લા કલેક્ટર તેજસ પરમારની ઉપસ્થિતિમાં ‘એમ્પ્લોયેબિલિટી એનહાન્સમેન્ટ પ્રોગ્રામ’ (EEP)નું લોન્ચિંગ કર્યું છે. આ એક વર્ષીય સર્ટિફિકેશન કોર્સનો મુખ્ય ઉદ્દેશ્ય યુવા એન્જિનિયરિંગ સ્નાતકો અને ડિપ્લોમા ધારકોને સૈદ્ધાંતિક જ્ઞાનની સાથે ઔદ્યોગિક જરૂરિયાતો મુજબનું વ્યવહારુ કૌશલ્ય પ્રદાન કરી તેમને રોજગાર માટે વધુ સક્ષમ બનાવવાનો છે.
પ્રથમ બેચમાં પસંદ કરાયેલા ૮૦ તાલીમાર્થીઓને (૪૦ એન્જિનિયરિંગ સ્નાતક અને ૪૦ ડિપ્લોમાધારક) ટેક્નિકલ કૌશલ્ય, ઔદ્યોગિક સલામતી, ક્વોલિટી મેનેજમેન્ટ અને આધુનિક મેન્યુફેક્ચરિંગ ક્ષેત્રના વ્યવસાયિક કૌશલ્યોની તાલીમ આપવામાં આવશે.
આ પ્રસંગે જિલ્લા કલેક્ટરશ્રી તેજસ પરમારે જણાવ્યું હતું કે, સુરતની વિકાસયાત્રા સ્થાનિક કુશળ પ્રતિભાના બળ પર આગળ વધી રહી છે. આ પહેલ યુવાનો માટે અર્થપૂર્ણ તકોનું સર્જન કરી ‘વિકસિત ભારત’ના નિર્માણમાં મહત્વનું યોગદાન આપશે.
AM/NS India ના ડિરેક્ટર અને વાઈસ પ્રેસિડેન્ટ (HR & Admin) આશુતોષ તેલાંગે જણાવ્યું કે, ઉદ્યોગ અને સમાજના સર્વાંગી વિકાસ માટે પ્રતિભાશાળી યુવાધનને તૈયાર કરવું અનિવાર્ય છે. SVNIT ના ડિરેક્ટર પ્રો. (ડૉ.) અનુપમ શુક્લાએ આ સહયોગને શૈક્ષણિક શ્રેષ્ઠતા અને ઔદ્યોગિક અનુભવના સમન્વય તરીકે ગણાવ્યો હતો.
નોંધનીય છે કે, AM/NS India ને તાજેતરમાં જ ભારત સરકારની ‘PM-SETU’ પહેલ અંતર્ગત સુરત ITI ક્લસ્ટર માટે ‘એન્કર ઇન્ડસ્ટ્રી પાર્ટનર’ તરીકે પસંદ કરવામાં આવી છે. ઉદ્યોગ, શિક્ષણ સંસ્થાઓ અને સરકારનો આ ત્રિવેણી સંગમ ભારતના મેન્યુફેક્ચરિંગ સેક્ટરને વધુ મજબૂત બનાવી ‘વિકસિત ભારત ૨૦૪૭’ ના લક્ષ્યાંકને સાકાર કરવામાં મહત્વની ભૂમિકા ભજવશે.
