સુરત: પાયાના ધોરણે ક્રિકેટમાં ઝડપી ઉદય અને વિસ્તરણને વેગ આપતાં ઈન્ડિયન સ્ટ્રીટ પ્રીમિયર લીગ (આઈએસપીએલ)એ સીઝન-3 માટે રૂ. 5.92 કરોડના જંગી ઇનામોની જાહેરાત કરી છે, જે ઉભરતી પ્રતિભાને ટેકો આપવા અને રમતગમતના માધ્યમથી તકો ઊભી કરવા પર લીગના ધ્યાનને મજબૂત બનાવે છે.
આઈએસપીએલની સીઝન-3 સુરતના લાલભાઈ કોન્ટ્રાકટ્ર સ્ટેડિયમ ખાતે 9 જાન્યુઆરીથી 6 ફેબ્રુઆરી, 2026 દરમિયાન યોજાશે. જેમાં માઝી મુંબઈ, ચેન્નઈ સિંઘમ્સ, ટાઈગર્સ ઓફ કોલકાતા, ફાલ્કન રાઇઝર્સ હૈદરાબાદ, બેંગલુરુ સ્ટ્રાઈકર્સ, શ્રીનગર કે વીર, અમદાવાદ લાયન્સ અને દિલ્હી સુપરહીરો સહિત આઠ ટીમ ભાગ લેશે.
આઈએસપીએલના કોર કમિટી મેમ્બર અને લીગ કમિશનર સુરજ સામતે જણાવ્યું હતું કે, “આઈએસપીએલની રચના એક સ્પષ્ટ હેતુ સાથે થઈ હતી. જેનો ઉદ્દેશ ગ્રાસરૂટ ક્રિકેટરોને નાણાકીય સુરક્ષા, માન્યતા અને વિકાસ માટે પ્લેટફોર્મ આપવાનો હતો. વિજય પાવલેના રેકોર્ડ રૂ. 32.50 લાખના કરાર આ લીગ દ્વારા ગ્રાસરૂટ પ્રતિભા પર મૂકવામાં આવતા મૂલ્યને દર્શાવે છે.
આશરે રૂ. 6 કરોડના ઈનામોની વણઝાર ખેલાડીઓને ફક્ત ટાઇટલ જીતવા માટે પ્રોત્સાહિત જ નહીં, પરંતુ સમગ્ર સિઝન દરમિયાન સતત પર્ફોર્મન્સ અને મેચ-વિનિંગ અસર માટે પુરસ્કાર આપવાની અમારી પ્રતિબદ્ધતાને પ્રતિબિંબિત કરે છે. ભારતની અગ્રણી ટેનિસ-બોલ T10 લીગ સાથે આઈએસપીએલએ ગ્રાસરૂટ ક્રિકેટ ઇકોસિસ્ટમમાં ક્રાંતિ લાવવાનું જારી રાખતાં ખાતરી કરી છે કે, ખેલાડીઓને માત્ર તક જ નહીં, પરંતુ સમગ્ર સીઝન દરમિયાન તેમના ઉમદા પર્ફોર્મન્સ માટે સતત પુરસ્કારોથી સન્માનિત કરવામાં આવે.
સીઝન-3 ચેમ્પિયન્સને રૂ. 2 કરોડ મળશે, જ્યારે રનર્સ-અપને રૂ. 1 કરોડ મળશે. લીગના મોસ્ટ વેલ્યુએબલ પ્લેયર (MVP)ને બ્રાન્ડ ન્યૂ પોર્શે 911 આપવામાં આવશે, જે તેને ભારતીય સ્પોર્ટ્સમાં સૌથી મૂલ્યવાન વ્યક્તિગત સન્માનો પૈકી એક બનાવશે. ખેલાડીઓને સમગ્ર સિઝન દરમિયાન પુરસ્કાર આપવામાં આવશે, જેમાં 44 મેચોમાં પ્રત્યેક રૂ. 50,000ના મેન ઓફ ધ મેચ એવોર્ડ્સ આપવામાં આવશે, જેની કુલ કિંમત રૂ. 22 લાખ થાય છે. ચાહકોનું જોડાણ મુખ્ય ફોકસ રહ્યું છે, જેમાં મેચદીઠ રૂ. 20,000ના કુલ 8.8 લાખની કિંમતના ફેન ઓફ ધ મેચ એવોર્ડ્સ સામેલ છે. ફાઇનલમાં અનન્ય પર્ફોર્મન્સને પણ બિરદાવવામાં આવશે. જેમાં બેસ્ટ બેટ્સમેન, બેસ્ટ બોલર અને બેસ્ટ ફિલ્ડરને રૂ. 2.5 લાખના પુરસ્કારો આપવામાં આવશે.
ISPL કોર કમિટીમાં સચિન તેંડુલકર, આશિષ શેલાર, મીનલ અમોલ કાલે અને સૂરજ સામતનો સમાવેશ થાય છે, જેઓ ગ્રાસરૂટ ક્રિકેટરો માટે તક, સમાવેશ અને વ્યાવસાયિક વિકાસ પર કેન્દ્રિત લાંબા ગાળાના વિઝન સાથે લીગનું માર્ગદર્શન કરવાનું ચાલુ રાખે છે.
